जळगाव (प्रतिनिधी) – खुन्नस देवून पाहिल्याच्या कारणावरुन दोन तरुणांमध्ये जोरदार हाणामारी झाली. या मारहाणीत दोघांकडून एकमेकांना टोकदार व टणकदार वस्तूने मारहाण करुन गंभीर जखमी केले. ही घटना दि. ३० मे रोजी रात्री ९ वाजेच्या सुमारास रिंगरोडवरील गोकुळ स्वीटमार्ट जवळ घडली. याप्रकरणी दोन्ही जणांनी दिलेल्या फिर्यादीवरुन परस्परविरोधात जिल्हापेठ पोलीसात गुन्हा दाखल करण्यात आला आहे.
शहरातील आदर्श नगरात राहणाऱ्या प्रेम सांगोरे हा दि. ३० मे रोजी रात्री त्याची आईसोत रिंगरोडवरील गोकुळ स्वीटमार्टजवळ भाजी घेण्यासाठी आला होता. यावेळी तेथून जात असलेल्या विजय संजय राठोड (लोहार) हा त्याठिकाणी आला. त्याने प्रेम सांगोरे याची कॉलर पकडून त्याला कमरेला लावलेल्या बेल्टने मारहाण केली. यावेळी प्रेमची आई भांडण सोडविण्यासाठी आली असता, त्यांना देखील राठोड याने धक्का दिला यामुळे त्यांना देखील दुखापत झाली आहे. प्रेमचा चुलत भाऊ ओम हा त्याच्या आईला घेण्यासाठी आला असता, त्याला देखील विजय राठोड याने मारहाण करीत काहीतरी टोकदार वस्तूने भोसकून गंभीर जखमी केले. दरम्यान, पोलिसांनी जखमी प्रेम सांगोरे व ओम सांगोरे यांनी उपचारार्थ जिल्हा रुग्णालयात पाठविले. उपचारानंतर त्यांनी दिलेल्या फिर्यादीवरुन संशयित विजय संजय राठोड याच्याविरुद्ध गुन्हा दाखल करण्यात आला आहे.
टोकदार वस्तूने वार करीत केले गंभीर जखमी
शिवाजी नगरात राहणारा विजय लोहार हा दि. ३० रोजी रात्री त्याचा मित्र रविंद्र पाटील याच्यासोबत जात होता. प्रेम सांगोरे हा हा त्याच्या आईसोबत उभा असतांना, त्याने रविंद्र पाटील याला आवाज दिला. दरम्यान, विजय लोहार याने मागे वळून बघितले असता, त्याला बघून प्रेम सांगोरे याने खून्नस देत शिवी दिली. त्याचा जाब विचारण्यासाठी विजय लोहार त्याठिकाणी गेल्यानंतर प्रेम सांगोरे व त्याच्या वडीलांनी मारहाण केली. काही वेळातच ओम सांगोरे हा तेथे आला, त्याने त्याच्याजवळ असलेल्या काहीतरी टणक टोकदार वस्तूने विजय लोहार याच्यावर वार केले. तसेच रस्त्यावर पडलेली फरशीचा तुकडा कमरेवर मारल्याने गंभीर जखमी केले. दरम्यान, विजय लोहार याने उपचार घेतल्यानंतर जिल्हापेठ पोलीसात तक्रार दिली. त्यानुसार संशयित प्रेम विलास सांगोरे, विलास रमेश सांगोरे व ओम कैलास सांगोरे यांच्याविरुद्ध गुन्हा दाखल करण्यात आला आहे
