चोपडा (प्रतिनिधी) : चोपडा तालुक्यात गावठी गायींचे कथित बळजबरीने उद्ध्वस्तीकरण, तसेच गोरक्षकांवर हल्ले व धमक्यांच्या घटनांविरोधात तातडीने कारवाई करावी, या मागणीसाठी रोहित निकम (सह-संयोजक, भाजप महाराष्ट्र राज्य सहकार आघाडी) यांनी इतर कार्यकर्त्यांसह उपविभागीय पोलीस अधिकारी, चोपडा यांना निवेदन सादर केले.
सादर करण्यात आलेल्या निवेदनात नमूद करण्यात आले आहे की, तालुक्यातील गोरक्षकांना धमक्या दिल्या जात असून काही प्रकरणांमध्ये त्यांच्यावर गुन्हे दाखल केले जात आहेत. हे प्रकार गौहत्या प्रतिबंधक कायद्याचे उल्लंघन असल्याचे नमूद करण्यात आले आहे. तसेच देशी गायींना ‘राज्यमाता-गौमाता’ दर्जा देण्यात आल्यामुळे या प्रकरणाचे गांभीर्य अधिक वाढल्याचेही निवेदनात म्हटले आहे.
या निवेदनाद्वारे गायींचे उद्ध्वस्तीकरण तात्काळ थांबविणे, गोरक्षकांवरील गुन्हे मागे घेणे, गौहत्या प्रतिबंधक कायद्याची कठोर अंमलबजावणी करणे, तसेच गोरक्षकांना धमक्या देणाऱ्यांवर कारवाई करून गौशाळांना संरक्षण देण्याची मागणी करण्यात आली आहे. दरम्यान, प्रशासनाच्या पुढील भूमिकेकडे सर्वांचे लक्ष लागले आहे.
