एरंडोल (प्रतिनिधी) कार्यालयातील वरिष्ठांकडून होत असलेल्या छळाला कंटाळून येथील भूमी अभिलेख कार्यालयातील कर्मचाऱ्याने विषारी द्रव्य प्राशन करून आत्महत्या करण्याचा प्रयत्न केला. आत्महत्या करत असल्याची चिठ्ठी कर्मचाऱ्याच्या खिशात आढळून आली.
कार्यालयातील वरिष्ठांकडून होत असलेल्या छळाला कंटाळून आत्महत्या करत असल्याची चिठ्ठी भूमी अभिलेख कार्यालयातील कर्मचारी संजय नामदेव पाटील यांच्या खिशात आढळून आली. मंगळवारी सकाळी ११ वाजेच्या सुमारास हा प्रकार उघड झाला, अशी माहिती संजय पाटील यांचा मुलगा प्रशांत पाटील याने दिली.
संजय नामदेव पाटील हे जमीन मोजणीचे काम करत असत. यांचे कुटुंब चाळीसगावला राहते. सोमवारी ते कार्यालयातच मुक्कामी थांबले. त्यावेळी संजय पाटील यांचे सोमवारी रात्री आठ वाजता पत्नीशी बोलणे झाले. सकाळी कार्यालयातील कर्मचारी आले असता कार्यालयाला आतून कडी लावली होती. त्यामुळे कर्मचाऱ्यांनी दरवाजा तोडून प्रवेश केला. त्यावेळी संजय पाटील हे खाली पडलेले दिसले. त्यांना सुरुवातीला एरंडोल उपजिल्हा रुग्णालयात दाखल करण्यात आले. त्यानंतर त्यांना शासकीय वैद्यकीय रुग्णालयात दाखल करण्यात आले. तेथून खासगी रुग्णालयात दाखल केले.
दरम्यान, यावेळी रुग्णालयातील कर्मचाऱ्यांनी ईसीजीसाठी त्यांचे शर्ट काढले. त्यावेळी त्यांच्या खिशात आत्महत्या करत असल्याची चिठ्ठी सापडली, त्यानंतर जिल्हापेठ पोलिसांना त्याची माहिती देण्यात आली असल्याचे डॉ. मनीष कोल्हे यांनी सांगितले.
