जळगाव (प्रतिनिधी) – शहरातील सुवर्ण पेढीच्या दालनातील वर्कशॉपमध्ये शिरलेल्या एका अनोळखीने दागिने तयार करणाऱ्या कारागिराला करंट मशिनद्वारे शॉक दिला. त्यानंतर तेथून दागिने लांबविण्याचा प्रयत्न केल्याची घटना दि. १६ मे रोजी बालाजी पेठेत घडली. परंतू कारागिराने संशयितासोबत झटापट करीत तो बाहेर पळत आला. त्यानंतर इतर कर्मचाऱ्यांनी संशयिताचा पाठलाग करीत पकड्याचा प्रयत्न केला, मात्र तो पर्यंत तो संशयित दुचाकीने पसार झाला होता. याप्रकरणी शनिपेठ पोलिसात गुन्हा दाखल करण्यात आला आहे.
शहरातील बालाजी पेठेतील आर.एल. ज्वेलर्स शोरुमच्या मागे असलेल्या याच सुवर्ण दालनाच्या दागिने तयार करण्याच्या वर्कशॉपमध्ये चांदी कारागिर भरत वसंतराव भामरे (४१, रा. आर.एल. कॉलनी) हे दि. १६ मे रोजी काम करीत होते. त्यावेळी तोंडाला रुमाल बांधलेला व टोपी घातलेला एक अनोळखी व्यक्ती त्याठिकाणी आला. त्याने अचानक भामरे यांचे केस पकडून डोक्याला, कानाखाली करंट मशिनने शॉक दिला. त्या वेळी आरडाओरड करीत कारागिराने विरोध केला, मात्र तो सतत शॉक देत राहिला. त्या वेळी दोघांमध्ये झटापट होऊन कारागिराने वरील मजल्यावर जाण्याचा प्रयत्न केला. मात्र अनोळखी त्यांना पायऱ्यांवरून खाली ओढत होता. या प्रकरणी कारागिराने शनिपेठ पोलिस ठाण्यात फिर्याद दिली. त्यावरून अज्ञात ३५ ते ४० वर्षीय व्यक्तीविरुद्ध गुन्हा दाखल करण्यात आला आहे. तपास उपनिरीक्षक संतोष खेडकर करीत आहेत.
संशयित दुचाकीवरुन पसार
झटापट करीत असलेल्या कारागिर भामरे यांनी कसेबसे तळ मजल्यावरून वर्कशॉपच्या बाहेर पडले. तेव्हा अनोळखी व्यक्ती त्यांचा पाठलाग करीत तेथेही पोहचला. मात्र त्याठिकाणी असलेल्या इतर कर्मचाऱ्यांनी त्याला पकडण्याचा प्रयत्न केला, मात्र तो दुचाकीवर बसून पसार झाला.
शॉक देत बेशुद्ध करण्याचा केला प्रयत्न
कारागिर भरत भामरे हे वर्कशॉपच्या तळमजल्यामध्ये चांदीचे दागिने तयार करीत होते. तळमजला असल्याने अनोळखीने तेथे शिरून कारागिराला शॉक देत बेशुद्ध करण्याचा व त्यानंतर दागिने लांबविण्याचा प्रयत्न केला होता. मात्र कारागिर बाहेर पडल्याने इतरांना हा प्रकार समजल्यामुळे चोरट्याचा दागिने लांबविण्याचा प्रयत्न फसला.
