जळगाव (प्रतिनिधी) भाजपचे ज्येष्ठ नेते एकनाथराव खडसे यांनी पक्षाचा प्राथमिक सदस्यत्वाचा राजीनामा दिल्याचे वृत्त समोर आल्यामुळे राज्याच्या राजकारणात एकच खळबळ उडाली होती. परंतू बाबांनी भाजपचा प्राथमिक सदस्यत्वाचा राजीनामा दिलेला नसल्याची प्रतिक्रिया जिल्हा बँकेच्या चेअरमन रोहिणीताई खडसे यांनी ‘द क्लिअर न्यूज’ सोबत बोलतांना दिली आहे.
सरकारनामा पोर्टलने खडसे यांनी भाजपचा प्राथमिक सदस्यत्वाचा राजीनामा दिला असल्याची बातमी नुकतीच प्रकाशित केली होती. सरकारनामाच्या बातमी नुसार खडसे यांचा पक्षप्रवेश येत्या गुरुवारी होत असल्याचे त्यांच्याच निकटवर्तीयांनी सांगितल्याचे वृत्तात म्हटले होते. एवढेच नव्हे तर खडसे यांनी दोन दिवसांपूर्वी भाजप सदस्यत्वाचा राजीनामा भाजपचे प्रदेशाध्यक्ष चंद्रकांत पाटील यांच्याकडे पाठविल्याचेही म्हटले होते. गुरुवारी मुंबईत पक्षाचे अध्यक्ष शरद पवार यांच्या उपस्थितीत खडसे यांचा प्रवेश निश्चित झाला असल्याचेही या वृत्तात म्हटले होते. परंतू याबाबत खडसे यांच्या कन्या तथा जिल्हा बँकेच्या चेअरमन रोहिणीताई खडसे यांनी ‘द क्लिअर न्यूज’ सोबत बोलतांना सांगितले की, बाबांनी भाजपचा प्राथमिक सदस्यत्वाचा राजीनामा दिलेला नाहीय, असा कोणताही विषय घडलेला नाही.
