चाळीसगाव ( प्रतिनिधी ) – अश्लील फोटो आणि व्हिडीओ व्हायरल करण्याची धमकी देत एका तरुणीकडून लाखोंची रोकड व सोन्याची खंडणी उकळल्याप्रकरणी अटक केलेल्या यश महेंद्रकुमार जैन याचा जामीन अर्ज जळगाव येथील अतिरिक्त सत्र न्यायालयाने फेटाळून लावला. प्रकरणाचे गांभीर्य अन् तपासाची आवश्यकता लक्षात घेऊन न्यायालयाने हा महत्त्वपूर्ण निर्णय दिला.
चाळीसगाव शहर पोलीस ठाण्यात दाखल गुन्ह्यानुसार, संशयित यश जैन याने पीडित तरुणीशी मैत्री करून व्हिडिओ कॉलद्वारे तिचे खासगी फोटो व व्हिडिओ मिळवले. त्यानंतर ते सोशल मीडियावर व्हायरल करण्याची धमकी देत वेळोवेळी पैशांची मागणी केली. यश याने पीडितेकडून सुमारे ८ लाख १२ हजार रुपये तसेच जवळपास ९० ग्रॅम सोन्याचे दागिने उकळल्याचे फिर्यादीत नमूद आहे.
या प्रकरणी सुनावणीदरम्यान सरकारी पक्षाने न्यायालयात, तपासादरम्यान आरोपीच्या मोबाईलमध्ये ३३ महिलांचे फोटो आढळले असून, पीडितेला धमकावणारे आणि अश्लील स्वरूपाचे संदेश व चॅट्सही समोर आले आहेत. तसेच आरोपीने काही व्हॉट्सअॅप चॅट्स डिलीट केल्याचेही तपासातून उघड झाल्याचा दावा केला. या प्रकरणात पीडितेच्या वतीने अॅड. सय्यद रफीक अहमद यांनी युक्तिवाद केला. तर तपास अद्याप सुरू असून अनेक महत्त्वाच्या बाबींचा उलगडा होणे बाकी असल्याचे सांगितले. आरोपीच्या इतर इलेक्ट्रॉनिक खात्यांचा शोध, व्हॉइस सॅम्पल तपासणी तसेच आर्थिक व्यवहारांची पडताळणी करणे आवश्यक असल्याने जामीन मंजूर करू नये, अशी त्यांनी मागणी केली. दोन्ही बाजूंचा युक्तिवाद ऐकल्यानंतर न्यायालयाने प्राथमिक पुराव्यांवरून आरोपीने फोटो व व्हिडीओच्या आधारे पीडितेला धमकावत पैशांची मागणी केल्याचे प्रथमदर्शनी दिसून येते. तसेच तपासाच्या दृष्टीने इलेक्ट्रॉनिक पुरावे, आर्थिक व्यवहार आणि इतर तांत्रिक बाबींची सखोल चौकशी आवश्यक असल्याने आरोपीस जामीन देणे योग्य ठरणार नाही, असे मत नोंदवले. त्यामुळे न्यायालयाने यश जैन याचा जामीन अर्ज फेटाळून लावला. तसेच तपास यंत्रणेला पुढील चौकशी सुरू ठेवण्याचा मार्ग मोकळा करुन दिला
