छत्रपती संभाजीनगर (वृत्तसंस्था) आंबेलोहळ येथे चार दिवसांपूर्वी घरगुती कारणावरून झालेल्या भांडणामध्ये जखमी जावयाचा बुधवारी (दि. १२) रात्री ९ वाजेच्या सुमारास उपचारादरम्यान शासकीय रुग्णालयात मृत्यू झाला. अनिल पिंपळे (रा. आंबेलोहळ) असे मृत जावयाचे नाव आहे. याप्रकरणी ७ जणांविरूध्द खुनाचा गुन्हा दाखल करण्यात आला असून दोघांना अटक करण्यात आली आहे.
अनिल पिंपळे यांचा पत्नी गीता पिंपळेसोबत रविवारी (दि. ९) सकाळी घरगुती कारणावरून वाद झाल्याने तिने ही माहिती माहेरच्या मंडळीना दिली. जावई सतत मुलीला त्रास देत असल्याने गीताचे वडील संजय चव्हाण, आई पारूबाई चव्हाण, भाऊ कृष्णा चव्हाण, बहिणीचा पती करण पवार यांनी रविवारी सायंकाळी ६.३० वाजेच्या सुमारास आंबेलोहळ गाठले. जावई अनिल यास मेहुणा कृष्णा चव्हाण याने शिवीगाळ करीत लाकडी दांड्याने मारहाण केली तर साडू करण पवार याने चाकूने अनिलच्या डोक्यात व उजव्या पायावर वार करून जखमी केले होते. अनिल हा सासूसह गंभीर जखमी झाल्याने त्यास नातेवाईकांनी घाटीत उपचारार्थ दाखल केले होते.
या घटनेनंतर अनिलच्या नातेवाईकांनी रविवारी रात्री अनिलची सासरवाडी एकलहेरा येथे जाऊन त्याचा सासरा संजय चव्हाण व मेहुणा कृष्णा चव्हाण यांना बेदम मारहाण करुन जखमी केले होते. दरम्यान, सासरच्या मंडळीने केलेल्या मारहाणीत गंभीर जखमी झालेल्या अनिल पिंपळे याच्यावर चार दिवसांपासून शासकीय रुग्णालयात उपचार सुरू होते. बुधवारी रात्री ९ वाजेच्या सुमारास अनिलची प्रकृती खालावल्याने त्याचा मृत्यू झाला. याप्रकरणी एमआयडीसी वाळूज पोलीस ठाण्यात आरोपी सासरा संजय चव्हाण, सासु पारुबाई चव्हाण, मेहुणा कृष्णा चव्हाण व साडू भाऊ करण पवार (सर्व रा. एकलेहरा) यांच्याविरुध्द खुनाचा गुन्हा दाखल करण्यात आला आहे.
आरोपी पारुबाई चव्हाण व साडुभाऊ करण पवार या दोघांना पोलिसांनी अटक केली आहे. याप्रकरणात सहभागी अनिलचा सासरा संजय चव्हाण व मेहुणा कृष्णा चव्हाण हे अनिलच्या नातेवाईकांनी केलेल्या मारहाणीत जखमी असल्याने त्यांच्यावर शासकीय रुग्णालयात उपचार सुरू आहेत. दरम्यान नातेवाईकांनी अनिलचा मृतदेह ताब्यात घेण्यास नकार दिल्याने घाटीत काही काळ तणाव निर्माण झाला. अखेर पोलिसांनी कारवाईचे आश्वासन देत त्यांची समजूत काढली. प्रकरणात इतर आरोपी फरार असून पुढील तपास उपनिरीक्षक सचिन पागोटे करीत आहेत.
