नागपूर (वृत्तसंस्था) पहिल्याच भेटीत प्रेयसीला कॅफे हॉटेलमध्ये बोलाविल्यानंतर प्रियकराने शारीरिक संबंध स्थापित केले. प्रेयसी गर्भवती झाल्यानंतर मात्र त्याने ‘तो मी नव्हेच’ अशी भूमिका घेत पळ काढला. या प्रकरणी प्रेयसीच्या तक्रारीवरून पोलिसांनी बलात्काराचा गुन्हा दाखल केला. सचिन काळे (२४), असे आरोपीचे नाव आहे.
पीडित १७ वर्षीय तरुणी बारावीची विद्यार्थिनी आहे. तिची ओळख आरोपी सचिन काळेशी एप्रिल २०२० मध्ये झाली. दोघांनी काही दिवस मोबाइलवरून चॅटिंग केले. दोघेही एकमेकांच्या प्रेमात पडले. मे महिन्यात सचिनने प्रेयसीला एका कॅफेमध्ये भेटायला बोलावले. दोघांनी काही वेळ गप्पा केल्या आणि नंतर त्याने हॉटेलमधील रूममध्ये नेले. तिला शारीरिक संबंधाची मागणी केली. तिने नकार देऊन लग्न केल्यानंतरच प्रेमसंबंध कायम ठेवणार असल्याचे सांगितले. त्याने लगेच तिला लग्न करण्याचे आश्वासन दिले आणि तिच्यावर बलात्कार केला. यातून ती गर्भवती झाली. १५ ऑगस्टला तिच्या पोटात दुखायला लागले. तिने आईला पोटात दुखत असल्याचे सांगितले. तिला घेऊन आई नागपुरातील रुग्णालयात आली.
डॉक्टरांनी तपासून मुलगी गर्भवती असल्याचे सांगितले. आईला धक्का बसला. तिने मुलीला विचारणा केल्यानंतर सचिन काळेचे नाव सांगितले. सचिनच्या घरी जाऊन विचारणा केली असता त्याने प्रेमसंबंधाबाबत नकार दिला. त्यामुळे प्रेयसीने पोलिसांत तक्रार केली. या प्रकरणी पोलीस उपनिरीक्षक प्रियंका गेडाम यांनी गुन्हा दाखल करून आरोपीला अटक केली
