बुलढाणा (वृत्तसंस्था) चहा, नाश्त्याच्या हॉटेलमध्ये जादूटोणा, करणीच्या उद्देशाने काही विकृतांकडून लिंबू, सुया, बिबे टाचलेले व कुंकू लावलेले काळे बाहुले, खारीक सुपारी टाकण्याचा अघोरी प्रकार दर अमावास्या व पौर्णिमेला घडत होता. याप्रकरणी हॉटेल मालकाने तक्रार देताच मंगळवारी रात्री पोलिसांनी पारपेठ भागातील दोघांविरुद्ध गुन्हा दाखल केला.
एक वर्षापासून सुरु होता प्रकार !
मलकापूर शहरातील काझिपुरा भागातील रहिवासी शेख करीम शेख मुसा (३८) यांचे चहा, नाश्त्याचे हॉटेल आहे. एक वर्षापासून त्यांच्या हॉटेलात लिंबू, सुया, बिबे टाचलेले काळे बाहुले, खारीक, खिळे, सुपाऱ्या कुंकू लावून टाकण्यात येत आहे. हा अघोरी प्रकार दर अमावास्या व पौर्णिमेला घडत होता.
दोघांना ताब्यात घेत चौकशी सुरू !
शेख करीम यांनी याप्रकरणी पोलिसांत फिर्याद दिली. त्यानुसार पोलिसांनी शेख गफ्फार शेख सरदार (रा. पांढरी प्लॉट) व शेख मुश्ताक शेख रसूल (रा. बारादारी किल्ला) यांच्याविरुद्ध जादूटोणा कायद्यान्वये विविध गुन्हे दाखल केले. तसेच दोन्ही आरोपींना ताब्यात घेऊन चौकशी सुरू केली. पुढील तपास पोलिस निरीक्षक विलास पाटील करीत आहेत. दरम्यान, जादूटोण्याच्या उद्देशाने संशयास्पद वस्तू टाकल्या जात असल्याने नागरिकांमध्ये भीतीचे वातावरण निर्माण झाले आहे.
सीसीटीव्ही कॅमेऱ्यात दोघं अडकले !
वर्षभरापासून काळे बाहुले टाकल्या जात असल्याच्या प्रकाराला शेख करीम वैतागले होते. हा प्रकार कोण करतोय?, याचा त्यांनी तपास करण्याचा प्रयत्न केला. अखेर सीसीटीव्ही कॅमेऱ्यांची मदत त्यांनी घेतली. हॉटेलात सीसीटीव्ही कॅमेरे बसवण्यात आले. २६ नोव्हेंबर रोजी सीसीटीव्ही कॅमेऱ्यात हा अघोरी प्रकार करणारे कैद झाले. शेख गफ्फार व शेख मुश्ताक हे दोघे काळे बाहुले ठेवत असल्याचे निदर्शनास आल्यानंतर पोलिसांत धाव घेण्यात आली.
