जळगाव (प्रतिनिधी) बीएचआर घोटाळ्यातील ११ संशयितांना पुणे विशेष न्यायालयाने १४ जुलै रोजी तात्पुरता जामीन मंजूर केला होता. जामीन देतांना न्यायालयाने मॅच केलेल्या पावत्यांची एकूण २० टक्के रक्कम १० दिवसांच्या आत भरण्याची प्रमुख अट घातली होती. त्यानुसार सर्व संशयित कर्जदारांनी २० टक्के रक्कम भरुन कारागृहातून सुटका करुन घेतली आहे. त्यातील भागवत भंगाळेंसह अवघ्या चार संशयितांनी १ कोटी ४२ लाख ३४ हजार २७८ रुपये कोर्टात भरल्याचे समोर आले आहे.
पुणे पोलिसांच्या आर्थिक गुन्हे शाखेने १७ जून रोजी ११ जणांना अटक केली होती. सर्व संशयितांनी जामिनासाठी न्यायालयात अर्ज दाखल केला होता. सुनावणी होऊन विशेष न्यायालयाने त्यांना प्रत्येकी एक लाख रुपयांच्या वैयक्तिक जातमुचल्यावर सशर्त जामीन मंजूर केला होता. त्यानुसार १५ आॅक्टोबर २०२१ पर्यंत परतफेड करायच्या ४० टक्के रकमेपैकी २० टक्के रक्कम १० दिवसांत जमा करण्याची प्रमुख अट होती. या अटींनुसार सर्वांनी टप्प्याटप्प्याने पैसे भरुन सुटका करुन घेतली आहे.
न्यायालयाचे आदेशान्वये गुन्हयातील जामीनावरील संशयित आरोपी प्रेम रामनारायण कोगटा यांनी दि. १७ जुलै रोजी त्यांचे पासपोर्ट जमा केले. तसेच दि. १९जुलै रोजी ४३,२०,०००/- रुपयांचा डीडी मा. जिल्हा सत्र न्यायालय २, पुणे यांचे नावाने काढून तो मा. न्यायालयात जमा केला आहे. त्याच प्रमाणे भागवत गणपत भंगाळे यांनी दि. १६ जुलै रोजी मा. जिल्हा न्यायाधिश, पुणे यांचे नावाने रु. २१,०८,०००/- रक्कमेचा डीडी काढुन तो मा. न्यायालयात जमा केला. तसेच त्यांचा पासपोर्ट क्र. के६५२२३२४ हा दि. २२ जुलै रोजी आर्थिक गुन्हे शाखेकडे जमा केला आहे.
तर प्रितेश चंपालाल जैन यांनी दि. २० जुलै रोजी मा. जिल्हा न्यायाधिश २, पुणे यांचे नावाने रु. ३०,२१,९९०/ रक्कमेचा डीडी काढुन तो न्यायालयात जमा केला. तसेच पासपोर्ट क्र. एल४८२४२६० हा दि. २२ जुलै रोजी आर्थिक गुन्हे शाखेकडे जमा केला आहे. जितेंद्र रमेश पाटील यांनी दि. २० जुंली रोजी मा. जिल्हा न्यायाधिश २, पुणे यांचे नावाने रु. १३,५१, २९०/- रक्कमेचा डीडी काढुन तो मा. न्यायालयात जमा केला. तसेच पासपोर्ट क्र. आर२९४७३४६ दि. २२ जुलै रोजी आर्थिक गुन्हे शाखेकडे जमा केला आहे. दुसरीकडे भागवत गणपत भंगाळे यांनी दि. २० जुलैला पुन्हा मा. जिल्हा न्यायाधिश २, पुणे यांच्या नावाने रु. ३४,३५,९९८/ रक्कमेचा डीडी काढून तो न्यायालयात जमा केला होता. त्यानुसार वरील अवघ्या पाच संशयितांनी १ कोटी ४२ लाख ३४ हजार २७८ रुपये कोर्टात भरल्याचे समोर आले आहे.
