जळगाव (प्रतिनिधी) भाईचंद हिराचंद रायसोनी (बीएचआर) घोटाळ्यातील मुख्य संशयित आरोपी सुरज झंवरचा जामीन अर्ज १ लाखाच्या वैयक्तिक जातमुचलक्यावर मुंबई हायकोर्टाने मंजूर केला आहे. दरम्यान, बीएचआर घोटाळ्यात पहिल्यांदा मुख्य संशयित झंवरला मोठा दिलासा मिळाला असून महाराष्ट्राबाहेर राहण्याच्या अटीवर जामीन मंजूर करण्यात आला आहे.
दरम्यान, सुरज झंवरला महाराष्ट्रातून तडीपार करण्यात आले असून अटी शर्तीनुसार त्याला महाराष्ट्रात राहता येणार नसून तपासात वेळोवेळी आर्थिक गुन्हे शाखेला सहकार्य करण्याचेही आदेश उच्च न्यायालयाने दिले आहेत.
मुंबई उच्च न्यायालयाच्या न्यायमूर्ती एम. डब्ल्यू सामरे यांच्या खंडपीठासमोर आज शुक्रवारी सूरज झंवर याच्या जामिनाच्या निकालावर कामकाज झाले आहे. दरम्यान जामीन मंजूर झाला असून त्यावर अद्याप न्यायालयाकडून ऑर्डर मिळाली नसल्याचे कळते. जामीन देताना न्यायालयाने दिलेल्या अटी शर्थींचा भंग केल्यास सूरज झंवरवर कठोर कारवाई होवु शकते असेही उच्च न्यायालयाने अटी शर्तीनुसार जामीन देताना म्हटले आहे.
बीएचआर पतसंस्थेतील कोट्यावधींच्या घोटाळा प्रकरणातील मुख्य संशयित सुनील झंवर याचा मुलगा सुरज झंवर मागील काही महिन्यांपासून पोलीस कोठडीत होता. सुरज झंवरला पुणे आर्थिक गुन्हे शाखेच्या पथकाने २२ जानेवारीला सायंकाळी अटक केली होती. दरम्यान, बीएचआर पतसंस्थेतील कोट्यावधींच्या घोटाळा प्रकरणात आर्थिक गुन्हे शाखेने विविध बँकांना सुरज झंवर व कुटुंबियांच्या बँक खात्यांची माहिती घेण्यासाठी तसेच ती खाती गोठविण्यासाठी काही बँकांना पत्र दिले होते. परंतू सुरज झवरने बँक खाती गोठवू नका म्हणून बँकेच्या अधिकाऱ्यांना फोनवरून धमकावल्याची माहिती पोलीस तपासात समोर आली होती. दरम्यान, सुरजने संगनमत करून पुणे, निगडी आणि नशिराबाद येथील करोडोच्या मालमत्ता कवडीमोल दरात खरेदी केल्याचेही पोलीस तपासात समोर आले होते.
सरकारी वकील अॅड. प्रवीण चव्हाण यांनी सुरतच्या जामीन अर्ज विरोधात जोरदार युक्तिवाद केला होता. सुरज हा मुख्य सूत्रधार असून त्याच्या कार्यालयात अनेक महत्त्वपूर्ण कागदपत्र लॅपटॉप सापडले आहेत. तसेच मालमत्ता विकण्यात त्याची महत्त्वाची भूमिका होती. त्यामुळे त्यांचा जामीन अर्ज फेटाळण्यात यावा, अशी अॅड. चव्हाण यांनी न्यायालयाकडे मागणी केली होती. तर दुसरीकडे सुरज झंवरला सुप्रीम कोर्टानेही नुकताच जोरदार झटका दिला होता. मला देण्यात आलेली नऊ दिवसांची पोलीस रिमांड बेकायदेशीर असल्याबाबत निकाल द्यावा, अशी सुरजची याचिका सुप्रीम कोर्टाने फेटाळून लावत अर्जात तथ्य नसल्याचे सांगून योग्य त्या न्यायालयात दाद मागण्याच्या सूचना त्याला दिल्या होत्या. त्यानंतर सुरज झंवरचा जामीन अर्ज पुणे न्यायालयाने देखील फेटाळून लावला होता.सुरज झंवरच्या विरोधात एप्रिल महिन्याच्या अखेरीस पुणे विशेष न्यायालयात पुणे आर्थिक गुन्हे शाखेने दोषारोपपत्र दाखल केले होते. त्यानंतर मुंबई हायकोर्टाने सुनावणीनंतर २४ मे रोजी याबाबत २८ मे रोजी तारीख दिली होती. त्यानुसार आज मुंबई हायकोर्टाने सुरज झंवरचा जामीन अर्ज मंजूर करत त्याला दिलासा दिला आहे.
