जळगाव (प्रतिनिधी) बीएचआर घोटाळ्यातील ‘त्या’ अकरा संशयितांना न्यायालयाने २३ ऑक्टोबरपर्यंत अंतरिम जामीन वाढवून दिल्यामुळे मोठा दिलासा मिळाला आहे. दरम्यान, या सर्व संशयितांनी ठरल्याप्रमाणे न्यायालयात दुसऱ्या हप्त्याची रक्कम देखील जमा केली असल्याची माहिती विशेष सरकारी वकील अँड. प्रवीण चव्हाण यांनी दिली आहे.
भाईचंद हिराचंद रायसोनी मल्टीस्टेट कॉ ऑप क्रेडीट सोसायटीत गैरकारभार तसेच फसणुकीबाबत फिर्यादी रंजना खंडेराव घोरपडे यांनी दिलेल्या फिर्यादीवरुन पुणे येथील डेक्कन पोलीस ठाण्यात भादंवि कलम 420, 464, 465, 468,471,474,120 ब, 34 सह एमपीआयडी ऍक्ट कलम 3 अन्वये 24 नोव्हेंबर 2020 रोजी गुन्हा दाखल झाला होता.
या गुन्ह्यात पुणे आर्थिक गुन्हे शाखेने 17 जून रोजी जळगाव जिल्ह्यातील भागवत भंगाळे, प्रेम नारायण कोगटा, संजय तोतला तिन्ही रा. जळगाव, जयश्री शैलेश मणीयार रा. पाळधी, जयश्री अंतिम तोतला रा. मुंबई, जितेंद्र रमेश पाटील रा. जामनेर, आसिफ मुन्ना तेली रा. भुसावळ, छगन शामराव झाल्टे रा. जामनेर, राजेश शांतीलाल लोढा रा. तळेगाव ता. जामनेर, यांच्यासह प्रितेश चंपालाल जैन रा. धुळे, अंबादास आबाजी मानकापे रा. औरंगाबाद या 11 जणांना अटक केली होती.
कोर्टात भरले होते ३ कोटी १३ लाख !
या ११ संशयितांना पुणे विशेष न्यायालयाने अंतरिम जामीन मंजूर करतांना संशयितांना मॅच केलेल्या पावत्यांची एकूण २० टक्के रक्कम भरण्याची प्रमुख अट घातली होती. त्यानुसार सर्व संशयितांनी त्यावेळी न्यायालयात एकूण ३ कोटी १३ लाख १७ हजार ६८३ रुपये भरले होते.
पुणे पोलिसांच्या आर्थिक गुन्हे शाखेने १७ जून रोजी ११ जणांना अटक केली होती. सर्व संशयितांनी जामिनासाठी न्यायालयात अर्ज दाखल केला होता. सुनावणी होऊन विशेष न्यायालयाने त्यांना प्रत्येकी एक लाख रुपयांच्या वैयक्तिक जातमुचलक्यावर सशर्त जामीन मंजूर केला होता. त्यानुसार १५ आॅक्टोबर २०२१ पर्यंत परतफेड करायच्या ४० टक्के रकमेपैकी २० टक्के रक्कम १० दिवसांत जमा करण्याची प्रमुख अट होती. या अटींनुसार सर्वांनी पैसे भरले होते.
कोणी भरले किती पैसे होते
जयश्री तोतला (२९ लाख ३३ हजार ५९४ रुपये), अंबादास मानकापे (५४ लाख २३ हजार ३२८ रुपये), संजय तोतला (२० लाख ५८ हजार ७३४ रुपये), राजेश लोढा (२६ लाख २८ हजार९१२ रुपये), आसिफ तेली (२२ लाख ४२ हजार ४२५ रुपये), जयश्री मणियार (१७ लाख ९३ हजार ४१२ रुपये), प्रीतेश जैन (३० लाख २१ हजार ९९० रुपये), छगन झाल्टे (३४ लाख ३५ हजार ९९८ रुपये), जितेंद्र पाटील (१३ लाख ५१ हजार २९० रुपये), भागवत भंगाळे (२१ लाख ८ हजार), प्रेमनारायण कोकटा (४३ लाख २० हजार), असे सर्व संशयितांनी न्यायालयात एकूण ३ कोटी १३ लाख १७ हजार ६८३ रुपये भरले होते.
दरम्यान, बुधवार आणि गुरुवार या दोन दिवसात पुन्हा या संशयितांनी ठरल्याप्रमाणे दुसरा हप्ता भरला आहे. त्यामुळे त्यांना 23 ऑक्टोबरपर्यंत पोलिस स्थानकात हजेरी लावण्याच्या अटीपासून न्यायालयाने शिथिलता दिली असल्याचे कळते. दरम्यान, या प्रकरणात विशेष सरकारी वकील अँड. प्रवीण चव्हाण यांचा जोरदार युक्तिवाद सुरूच आहे.
अकाउंट डिफ्रीझ होण्यापासून तूर्त दिलासा नाहीच
न्यायालयात सुनील झंवरच्या परिवारातील तीन सदस्यांनी पुणे आर्थिक गुन्हे शाखेने फ्रिज केलेले अकाउंट डीफ्रिज करण्यात यावे अर्थात खुले करण्यात यावे, या संदर्भात अर्ज दाखल केला होता. परंतु, यावर आज सुनवाई होऊ शकली नाही. या तिघा अर्जांवर 23 ऑक्टोबर रोजीच सुनवाई होणार असल्याचे देखील कळते.
न्यायालयात बहुतांश संशयित आरोपींची हजेरी
बीएचआर घोटाळ्यातील दुसऱ्या सत्रात अटक केलेल्या 11 संशयित आरोपीपैकी आज पुणे विशेष न्यायालयातील एस.एस. गोसावी यांच्या कोर्टात आज बहुतांश आरोपींनी हजेरी लावली होती. सकाळी 11 वाजेपासून सर्व जण न्यायालयात हजर होते. तर अंतरिम जामीन वाढवून दिला जाईल की नाही? या चिंतेने अनेकांना घाम फुटल्याचे दिसून येत होते.
विजय वाघमारे
(9284058683)
