जळगाव (प्रतिनिधी) बीएचआर पतसंस्थेतील कोट्यावधींच्या घोटाळा प्रकरणातील मुख्य संशयित सुनील झंवर याचा मुलगा सुरज झंवरला २ फेब्रुवारीपर्यंत पोलीस कोठडी सुनावण्यात आली आहे. न्यायालयाने तब्बल १० दिवसांची पोलीस कोठडी दिल्यामुळे पोलिसांनी रिमांड नोटमध्ये खूपच महत्वपूर्ण मुद्दे दिल्याचे स्पष्ट होत आहे.
बीएचआर घोटाळ्यातील मुख्य संशयित सुनील झंवर याचा मुलगा सुरज झंवरला पुणे आर्थिक गुन्हे शाखेच्या पथकाने शुक्रवारी सायंकाळी अटक केली होती. सुरज झवरला जळगावच्या घरून सायंकाळी सात वाजेच्या सुमारास अटक करण्यात आली होती. त्यानंतर सुरज झंवरला घेवून आर्थिक गुन्हे शाखेचे पथक तात्काळ पुण्याच्या दिशेने रवाना झाले. आज त्याला न्यायालयात हजर केले असता न्यायालयाने २ फेब्रुवारीपर्यंत पोलीस कोठडी सुनावली. तब्बल १० दिवसांची पोलीस कोठडी दिल्यामुळे पुणे आर्थिक शाखेच्या पथकाने रिमांड नोटमध्ये तपासाठी महत्वाचे मुद्दे दिले असल्याचे स्पष्ट आहे. दरम्यान, बीएचआर घोटाळ्यातील मुख्य संशयित आरोपी सीए महावीर जैनचा जामीन अर्ज काल न्यायालयाने फेटाळून लावला आहे. तर धरम सांखला, विवेक ठाकरे, सुजित वाणीच्या जामीन अर्जावर दि. २७ (बुधवार) निकाल येण्याची शक्यता आहे.
दुसरीकडे नाशिकमधील मांडसांगवी येथील १०० कोटीची जमीन बीएचआर पतसंस्थेतील कोट्यावधींच्या घोटाळा प्रकरणातील मुख्य संशयित सुनील झंवरने अवघ्या तीन कोटीत घेतली होती. या प्रकरणाची मुख्यमंत्री उद्धव ठाकरे यांनी गंभीर दखल घेत जिल्हाधिकाऱ्यांना चौकशी आदेश दिले होते. त्यानंतर आता अपर महसूल सचिवांनी न्यायाधिकरणाने दिलेल्या निर्णयाविरोधात जिल्हाधिकारी व विभागीय आयुक्तांना आव्हान याचिका दाखल करण्याचे आदेश दिल्यामुळे झंवरच्या अडचणीत मोठी वाढ झाली आहे.
