भुसावळ (प्रतिनिधी) गेल्या काही वर्षांपासून शहरात अतिक्रमण मोठया प्रमाणात वाढले आहे. यावर आता पालिका प्रशासनाने धडक कारवाई सुरू केली आहे. या मोहिमेंतर्गत रस्त्यालगत असलेली दुकाने तसेच बांधकामावर बुल्डोजर चालविण्यात आले. अतिक्रमण हटाव मोहिमेच्या दुसऱ्या दिवशी शहरातील खडका चौफुली, जाम मोहल्ला आणि गवळी वाड्यातील अतिक्रमण हटविण्यात आले. यावेळी खडका रोड परिसरात कारवाई वरुन माजी गटनेते मुन्ना तेली यांच्या मुलाने विरोध केला. यावेळी पोलिसांना धक्काबुक्की केल्याप्रकरणी त्यांना अटक करण्यात आली आहे.
शहरात पालिका प्रशासनातर्फे अतिक्रमण मोहीम राबवण्यात येत आहे. या मोहीमेच्या दुसऱ्या दिवशी खडका रोड परिसरात अतिक्रमण मोहिमेस सुरुवात करण्यात आली. सकाळी डॉ. बाबासाहेब आंबेडकर पुतळ्यापासून ते रजा टावर चौक या रस्ता दरम्यान असलेल्या दुकानांचे फलक काढण्यात आले. तसेच काही हातगाडीधारकांनी अतिक्रमण केले होते, त्यांनाही हटविण्यात आले. यानंतर रजा टॉवर ते खडका चौफुली दरम्यान पालिकेचे पथकाने कारवाई सुरू केली.
शहरात पोलीस अधिकाऱ्यास धक्काबुक्की
यादरम्यान भाजपाचे माजी गटनेते हाजी मुन्ना तेली यांच्या आशा हाईट्स समोर असलेल्या त्यांच्या कार्यालयासमोर पालिकेचे पथक आले असता, नाल्यावर असलेला धापा जेसीबीच्या सहाय्याने काढू लागले. मात्र आशिक तेली यांनी या कारवाईस विरोध केला. सहाय्यक पोलीस निरीक्षक हरीश भोये यांनी त्यांची समजूत घातली असता, भोये यांची कॉलर पकडून त्यांना धक्काबुक्की करण्यात आली. त्यामुळे पोलिसांनी आशिक तेली यांची धुलाई केली. त्यामुळे परिसरात तणावाचे वातावरण निर्माण झाले होते. यानंतर आशिक तेली यांना पोलीस व्हॅनमध्ये बसवून बाजारपेठ पोलिस ठाण्यात नेण्यात आले. याबाबत सहाय्यक पोलीस निरीक्षक हरीश भोये यांच्या फिर्यादीवरून शासकीय कामांत अडथळा निर्माण केल्याबद्दल गुन्हा दाखल करण्यात आला आहे.
पोलीस निरीक्षकांनी केली पत्रकारास मारहाण
खडका रोड परिसरात अतिक्रमण मोहिमेदरम्यान मुन्ना तेली यांच्या कार्यालयासमोर वाद झाला. यावेळी घटनेचे छायाचित्र काढताना बाजारपेठ पोलिस ठाण्याचे निरीक्षक राहुल गायकवाड यांनी पत्रकार ज्ञानेश्वर आमले यांना मारहाण केली. त्यांच्या कानाला दुखापत झाली असून याबाबत त्यांनी जिल्हा पोलिस अधीक्षक यांच्याकडे तक्रार केली आहे. यात त्यांनी पोलीस निरीक्षक गायकवाड यांच्यापासून आपल्या जीवितास धोका असल्याचे नमूद केले आहे. तसेच त्यांचा मोबाईल देखील जप्त करण्यात आला असून गायकवाड यांच्यावर कारवाई करण्यात यावी, अन्यथा आमरण उपोषण करण्याचा इशारा दिला आहे.
दुकानदारांनी स्वतःच काढले अतिक्रमण
खडका रोड परिसरात चहाच्या टपऱ्या, पान टपरी, गॅरेजच्या टपऱ्या, नाश्ता सेंटर, वडापाव विक्रेत्यांनी दुकाने थाटली होती. मात्र पालिकेने अतिक्रमण हटाव मोहिम राबवली जाणार असल्याची सूचना दिल्याने जास्तीचे नुकसान टाळण्यासाठी व्यावसायिकांनी आधीच टपऱ्या हलवल्या तर ज्या व्यावसायीकांनी अतिक्रमण हटवले नाही त्यांच्यावर कारवाई करण्यात आली.
