भुसावळ (प्रतिनिधी) येथील स्टेट बँक शाखेची गृहकर्ज वाटपात तब्बल दिड कोटींची फसवणूक केल्याप्रकरणी १७ कर्जदारांविरोधात फसवणुकीचा गुन्हा दाखल करण्यात आला होता. या गुन्ह्यातील सहा कर्जदारांना रविवारी पोलिसांनी अटक केली होती. आज आरोपींना भुसावळ न्यायालयात हजर केले असता त्यांना २८ ऑक्टोबरपर्यंत तीन दिवसांची पोलीस कोठडी सुनावण्यात आली.
बोगस कर्ज वाटपाबाबत वरीष्ठ स्तरावर तक्रारी करण्यात आल्यानंतर वरीष्ठ स्तरावरून चौकशीअंती कर्जदार, व्हॅल्यू अरसह १७ जणांविरोधात बाजारपेठ पोलिसात गुन्हा दाखल करण्यात आला आहे. पोलिसांनी रविवारी राजेश निवृत्ती मेहरे, शकील इमाम गवळी, आसीफ हुसेन गवळी, गजानन रमेश शिंपी, निलेश जय सपकाळे, पंकज भोजनराव देशमुख यांना अटक केली होती. आरोपींना सोमवारी न्यायालयात हजर केले असता त्यांना तीन दिवसांची अर्थात २८ ऑक्टोंबरपर्यंत पोलीस कोठडी सुनावण्यात आली. तपास बाजारपेठ पोलीस निरीक्षक दिलीप भागवत यांच्या मार्गदर्शनाखाली सुरू आहे.
