जळगाव (प्रतिनिधी) जळगाव जिल्हा सहकारी दूध उत्पादक संघावर मुख्यमंत्र्यांच्या आदेशाने प्रशासक मंडळाची नियुक्ती करण्यात आली आहे. त्यानुसार दूध संघाच्या मुख्य प्रशासकपदी चाळीसगाव विधानसभा मतदार संघाचे आमदार मंगेश चव्हाण यांची नियुक्ती करण्यात आली आहे. विशेष म्हणजे याच आदेशा सोबत दूध संघातील गैरकारभाराच्या तक्रारीवरून एक पाच सदस्यीय चौकशी समिती देखील शासने नियुक्त केली आहे.
महाराष्ट्र राज्य कृषि, पशुसंवर्धन, दुग्धव्यवसाय विकास व मत्स्यव्यवसाय विभागाने आज सहकारी संस्थेच्या (दुग्ध) सहनिबंधक निबंधकांना एक पत्र पाठवत जळगाव जिल्हा सहकारी दूध उत्पादक संघाच्या मुख्य प्रशासकपदी चाळीसगाव विधानसभा मतदार संघाचे आमदार मंगेश चव्हाण यांची नियुक्ती केल्याचे म्हटले आहे. तसेच पत्रात पुढे म्हटले आहे की, उपरोक्त विषयाच्या अनुषंगाने मला आपणास असे कळविण्याचे निर्देश आहेत की, जळगाव जिल्हा सहकारी दूध उत्पादक संघाच्या संचालक मंडळाचा ५ वर्षांचा कालावधी तसेच तद्नंतर महाराष्ट्र सहकारी संस्था अधिनियम १९६० मधील कलम ७३ मधील तरतूदीनुसार मुदतवाढ देण्यात आली आहे.
नविन संचालक मंडळाची निवड करण्यासाठी घ्यावयाच्या निवडणूका दि.३० सप्टेंबर २०२२ पर्यंत पुढे ढकलण्यात आल्या आहेत. या दूध संघाबाबत बऱ्याच तक्रारी प्राप्त झाल्या आहेत. मुख्यमंत्री यांच्या निर्देशानुसार समितीमार्फत सदर तक्रारीची चौकशी सुरु आहे. अशा स्थितीत जळगाव जिल्हा सहकारी दूध उत्पादक संघाच्या संचालक मंडळाची वैधानिक मुदत समाप्त झाली असल्याने सदर संचालक मंडळ बरखास्त करुन महाराष्ट्र सहकारी संस्था अधिनियम १९६० च्या कलम ७७ अ (फ) (दोन) अन्वये खालीलप्रमाणे नविन प्रशासक मंडळाची नियुक्ती करण्याचे मुख्यमंत्री यांचे निर्देश आहेत.
जाणून घ्या…कोण कोण आहेत, प्रशासक मंडळात !
मुख्य प्रशासक : मंगेश रमेश चव्हाण, चाळीसगाव
प्रशासक : चंद्रकांत निबाजी पाटील, मुक्ताईनगर
प्रशासक : चंद्रकांत बळीराम सोनवणे, चोपडा
प्रशासक : अजय एकनाथ भोळे, भुसावळ
प्रशासक : अमोल चिमणराव पाटील, पारोळा
प्रशासक : अरविंद भगवान देशमुख, जामनेर
प्रशासक : राजेंद्र वाडीलाल राठोड, चाळीसगाव
प्रशासक : अशोक नामदेव कांडेलकर, बोदवड
प्रशासक : गजानन पुडलीक पाटील, धरणगाव
प्रशासक : अमोल पंडीतराव शिंदे, पाचोरा
प्रशासक : विकास पंडीत पाटील, भडगाव
