पुणे (वृत्तसंस्था) राज्याचे उपमुख्यमंत्री अजित पवार यांचे मावस भाऊ जगदीश कदम यांच्या घरी ईडीने सकाळीच धाड टाकल्यामुळे एकच खळबळ उडाली आहे.
अजित पवार यांचे चिरंजीव आणि बहिणींच्या घरी आयकर विभागाने छापेमारी केल्याची घटना ताजी असतानाच अजितदादांना आणखी एक धक्का मानला जात आहे. अजितदादांचे मावस भाऊ जगदीश कदम यांच्या घरी ईडीने सकाळीच धाड टाकली.दौंड साखर कारखान्याच्या आर्थिक व्यवहारा संदर्भात ही छापेमारी करण्यात आल्याचं सांगण्यात आलं. अजित पवार यांचे मावस भाऊ असलेले जगदीश कदम हे दौंड सहकारी साखर कारखान्याचे संचालक आहेत. त्यांच्या घरी आज सकाळी ईडीचे अधिकारी पोहोचले व झाडाझडती सुरू केली. त्यामुळं एकच खळबळ उडाली आहे. जगदीश कदम हे सध्या मुंबईत असून ईडीच्या कारवाईची माहिती मिळताच ते पुण्याला निघाले असल्याचं सूत्रांकडून समजतं. अजित पवार यांच्याशी संबंधित कारखाने व कंपन्यांवरील कारवाईमुळे राष्ट्रवादी काँग्रेसच्या वर्तुळात सध्या अस्वस्थता आहे. याआधीही काटेवाडीमध्ये ईडीने छापेमारी केली होती. त्यानंतर काही दिवसांपूर्वी अजित पवारांच्या निकटवर्तीयांच्या घरी आयकर विभागाने धाड टाकली होती.
