जळगाव (प्रतिनिधी) जिल्ह्यातील एरंडोल येथील एका महिला डॉक्टरला बुधवारी जिल्हा व सत्र न्यायालयाने ५ वर्षांची सश्रम कारावासाची व एकत्रित ५२ हजार रुपये दंडाची शिक्षा सुनावली आहे. डॉ. सुरेखा शामलाल तोतला (४०, रा. मारवाडी गल्ली, एरंडोल), असे शिक्षा सुनावण्यात आलेल्या महिला डॉक्टरचे नाव आहे.
डॉ. सुरेखा तोतला यांनी २२ जून २०१२ रोजी कुसूमबाई बाळासाहेब मराठे (३५, रा. टोळी, ता. एरंडोल) यांचा गर्भपात केला होता. यात अतिरक्तस्रावामुळे महिलेचा मृत्यू झाला होता. याप्रकरणी तत्कालीन पोलिस निरीक्षक मोहन बनकर यांच्या फिर्यादीवरून २३ जून २०१२ रोजी एरंडोल पोलिस ठाण्यात तोतला यांच्याविरुद्ध भादंवि कलम ३०४, २०१ सह एमटीपी अॅक्ट ५ (३) (४) नुसार गुन्हा दाखल झाला होता. बनकर यांनी गुन्ह्याचा तपास करून तोतला यांच्याविरुद्ध दोषारोपपत्र दाखल केले होते. सुनावणीअंती जिल्हा व सत्र न्यायाधीश एस. एस. सापटणेकर यांनी डॉ. तोतला यांना ५ वर्षांची शिक्षा सुनावली आहे.
