भुसावळ (प्रतिनिधी) तालुक्यातील साकेगाव (Sakegaon) येथे १०० आणि २०० रुपये मूल्याच्या एकूण २० हजार रुपयांच्या बनावट नोटा (fake currency notes) सापडल्याने जिल्ह्यात प्रचंड खळबळ उडाली. याप्रकरणी भुसावळ पोलिसांनी साकेगावमधून शन्नो नामक ३५ वर्षीय महिला आणि पहूर (ता. जामनेर) येथून हनिफ पटेल (वय ५५) या दोघांना ताब्यात घेतले. या बनावट नोटांची छपाई कुठे सुरू होती? याचा तपास करण्यासाठी पथक जळगावातही येऊन गेले. (Jalgaon Crime News)
असा रचला सापळा !
राष्ट्रीय महामार्गावरील साकेगाव येथे ४० हजार रुपयांचे खरे चलन दिल्यावर त्या बदल्यात १ लाख रुपयांच्या बनावट नोटा मिळत असल्याची माहिती डीवायएसपी सोमनाथ वाघचौरे यांना मिळाली होती. त्यानुसार त्यांच्या पथकाने गेल्या आठवड्यापासून माहितीची खातरजमा सुरू केली. त्यात साकेगाव येथील एक महिला नोटांची देवाणघेवाण करत असल्याचे समोर आले. त्यानुसार डमी ग्राहकाजवळ ३ हजार रुपये देण्यात आले. त्या बदल्यास त्यास १५ हजारांच्या बनावट नोटा मिळाल्या. पडताळणीत या सर्व नोटांवरील क्रमांक एकसारखा असल्याचे दिसले. विशेष म्हणजे या नोटा भारतीय चलनातील नोटांप्रमाणेच अस्सल दिसत होत्या.
महिलेसह प्रौढ ताब्यात !
डीवायएसपी वाघचौरे, भुसावळ तालुक्याचे पोलिस निरीक्षक विलास शेंडे यांनी गुरुवारी अत्यंत गोपनीय पद्धतीने साकेगावमधून शन्नो (वय ३५) नावाच्या महिलेस चौकशीसाठी ताब्यात घेतले. तिच्या घरातून पोलिसांनी २० हजार रुपयांच्या बनावट नोटा जप्त केल्या. शन्नोने दिलेल्या माहितीवरून पहूर येथून हनिफ पटेल (वय ५५) याला ताब्यात घेतले. दोघांना तालुका पोलिस ठाण्यात आणून चौकशी केली. पहूर व परिसरात हनिफसोबत अजून कोणी सहकारी आहे का ? याचा शोध सुरू आहे. बनावट नोटांचे प्रकरण समोर आल्यानंतर पोलिसांची तीन पथके जिल्ह्यात वेगवेगळ्या ठिकाणी चौकशीसाठी रवाना झाले आहेत. त्यात प्रामुख्याने बनावट नोटांची छपाई कुठे होत होती? याचा तपास आता पोलीस करत आहेत.
दोघांविरुद्ध गुन्हा
या प्रकरणी पोहेकॉ विठ्ठल फुसे यांच्या फिर्यादीवरून शहनाज अमीन भोईटे (रा. साकेगाव, पाण्याचे टाकीजवळ, ता. भुसावळ) आणि हनीफ अहमदशरीफ देशमुख (रा. लाखोली, नाचणखेडा ता. जामनेर) यांच्या विरुद्ध गुन्हा दाखल करण्यात आला असून पुढील तपास सपोनि अमोल पवार हे करीत आहेत.
