मुंबई (वृत्तसंस्था) कुख्यात अंडरवर्ल्ड डॉन दाऊद इब्राहिमच्या मुंबईतील बऱ्याच ठिकाणी राष्ट्रीय तपास संस्था (NIA)ने आज पहाटे कारवाई केली. (Dawood Ibrahim ) दाऊदच्या डी गँगशी संबंधित (20)हून अधिक ठिकाणी एनआयएच्या अधिकाऱ्यांनी छापेमारी केली आहे. मुंबईत डी गँग पुन्हा सक्रिय होत असल्याची माहिती एनआयएला मिळाली होती. त्या पार्श्वभूमीवर ही कारवाई केली असल्याची माहिती समोर आली आहे.
एनआयएने सोमवारी सकाळी या कारवाईला सुरुवात केली. भेंडीबाजार नागपाडा, गोरेगाव, मुंब्रा, भिवंडी, सांताक्रुझ येथील एकूण २० ठिकाणांवर छापेमारी करण्यात आल्याचे वृत्त आहे. दाऊद इब्राहिम याच्याशी संबंधित ड्रग्ज पेडलर्स, हवाला ऑपरेटर्स आणि शार्प शुटर्सच्या मालमत्तांवर हे छापे टाकण्यात आले आहेत. या कारवाईतून आता एनआयएच्या हाती काय लागणार, याकडे सर्वांच्या नजरा लागल्या आहेत.
राष्ट्रीय तपास यंत्रणेने फेब्रुवारी महिन्यात दाऊद इब्राहिम आणि त्याच्या सहकाऱ्यांवर गुन्हा दाखल केला होता. त्यानंतर एनआयए सातत्याने दाऊदशी संबंधित मालमत्तांवर कारवाई करताना दिसत आहे. आजची कारवाईही त्याचाच एक भाग आहे. सूत्रांच्या माहितीनुसार, दाऊद गँग मुंबईत पुन्हा सक्रिय झाली होती. त्यांच्याकडून देशातील काही प्रमुख व्यक्तींना इजा किंवा घातपात करण्याचा कट आखण्यात आल्याची माहिती एनआयएला मिळाली होती. याच माहितीच्याआधारे एनआयएने आजची कारवाई केल्याचे सांगितले जाते.
राष्ट्रीय तपास यंत्रणेकडून दाऊदवर यूएपीए कायद्यातंर्गत गुन्हा नोंदवण्यात आल्यापासून दाऊदशी संबंध असलेल्या प्रत्येकाच्या हालचालीवर लक्ष ठेवले जात आहे. दाऊदच्या टोळीकडून चालवण्यात येणाऱ्या गुन्हेगारी आणि दहशवादी जाळ्याची पाळेमुळे खणण्याचे काम एनआयएकडून सुरु आहे. आतादेखील एनआयएने मुंबईतील दाऊदशी संबंधित असणाऱ्या व्यक्तींच्या मालमत्तांवर छापे टाकले आहेत. यामध्ये काही बांधकाम व्यावसायिकांचाही समावेश असल्याचे सांगितले जाते.
