जळगाव (प्रतिनिधी) जळगाव जिल्हा पोलीस दलाने मागील दोन दिवसात तीन वेगवेगळ्या धडक कारवायांमध्ये मोठा शस्त्रसाठा हस्तगत करत आठ जणांना अटक केली आहे. जप्त शस्त्रसाठ्यामध्ये गावठी पिस्तूल, जिवंत काडतुसांसह तलवारींचा समावेश आहे. पोलिस अधीक्षक एम. राजकुमार यांनी आज पत्रकार परिषदेत याबाबत माहिती दिली.
जळगावातून मध्यरात्री सहा जण ताब्यात !
जळगाव शहरातील एस. टी वर्कशॉप जवळ रात्री अंधारात काही जण हे मोटार सायकली घेऊन उभे असल्याची गोपनीय माहिती पोलिसांना मिळाली होती. त्यानुसार पोलीस निरीक्षक जयपाल हिरे, पो.ना. हेमंत कळसकर, चंद्रकात पाटील, प्रदीप पाटील, दिपक चौधरी, अशपाक शेख अशांनी मध्यरात्री ३ वाजता रस्ता लुट व दरोडयाच्या प्रयत्नात असलेले स्वप्नील उर्फ गोल्या धर्मराज ठाकुर, (वय-१९), निशांत प्रताप चौधरी (वय १९), पंकज चतुर राठोड (वय- १९), यश देवीदास शंकपाळ (वय १९) यांसह दोन अल्पवयीनांना ताब्यात घेतले होते. त्यांच्याजवळ गावठी बनावटचे पिस्टल, चाकु, मिरचीची पुड, दोर, ३ जिवंत काडतुस, दोन मोटार सायकली असे साहित्य मिळून होते.
गावठी कट्टा, जीवंत काडतूसासह तिघांना अटक !
गावठी कट्टा, दोन जीवंत काडतूस बाळगणाऱ्या आणि विक्री करणा-या अशा तिघांना भुसावळ उप विभागीय पोलिस अधिकारी सोमनाथ वाघचौरे यांच्या पथकाने भुसावळ शहरातून अटक केली आहे. ललीत तुलसीदास खरारे याच्याकडून गावठी कट्टा आणि जितेन आनंद बोयत याच्याकडून दोन जिवंत काडतूस जप्त करण्यात आले आहे. गावठी कट्टाआणि जीवंत काडतूस या दोघांना विक्री करणारा पवन किसन खरारे याला देखील अटक करण्यात आली आहे. या तिघांकडून दोन मोबाईल आणी मोटार सायकल हा मुद्देमाल देखील हस्तगत करण्यात आला आहे. भुसावळ उप विभागीय पोलीस अधिकारी सोमनाथ वाघचौरे यांच्या मार्गदर्शनाखाली त्यांच्या पथकातील पो.हे. कॉ. सुरज पाटील, पो.हे.कॉ. रमण सुरळकर, पो.ना. यासीन पिंजारी, पो.ना. संकेत झांबरे आदींनी या कारवाईत सहभाग घेतला. तर भुसावळ तालुक्यातील कंडारी गावात मयुर नारायण मोरे याने विना परवाना गावठी पिस्तूल आणि तलवारी बाळगल्या असल्याची माहिती एलसीबीचे निरीक्षक किसनराव नजन पाटील यांना मिळाली होती. मयुर मोरे व कल्पेश राजू मोरे यांच्याकडे एक गावठी पिस्तूल, ५ तलवारी, १ काडतूस मिळून आले. याप्रकरणी वरणगाव पोलीस ठाण्यात गुन्हा दाखल करण्यात आला आहे.
अडावद येथे एकाकडून गावठी कट्टा आणि जीवंत काडतूस जप्त !
अडावद येथे एक तरुण गावठी कट्टा तस्करी करणार असल्याची माहिती एलसीबीचे निरीक्षक किसनराव नजन पाटील यांच्या मार्गदर्शनाखाली कर्मचारी रविंद्र पाटील, दीपक शिंदे यांना मिळाली होती. पथकाने लागलीच बस क्रमांक (एमएच.२०.बीएल.२२७७) मध्ये बसलेल्या रमेश घुमरसिंग भिलाला याला ताब्यात घेतले. पोलिसांनी त्याची झाडाझडती घेतली असता त्याच्याकडे एक गावठी कट्टा आणि जीवंत काडतूस मिळून आले. याप्रकरणी अडावद पोलीस ठाण्यात गुन्हा दाखल करण्यात आला आहे.
पत्रकार परिषदेला यांची होती उपस्थिती !
पोलीस अधीक्षक एस.जयकुमार यांनी घेतलेल्या या पत्रकार परिषदेला भुसावळ उपविभागीय पोलिस अधिकारी सोमनाथ वाघचौरे, प्रशिक्षणार्थी उपविभागीय पोलिस अधिकारी सतीश कुलकर्णी, स्थानिक गुन्हे शाखेचे निरीक्षक किसनराव नजन पाटील, एमआयडीसीचे पोलीस निरीक्षक जयपाल हिरे, अडावद पोलीस ठाण्याचे सपोनि गणेश बुवा आदी उपस्थित होते.
