कोइंबतूर (वृत्तसंस्था) हेलिकॉप्टर अपघातात चीफ ऑफ डिफेंस स्टाफ जनरल बिपिन रावत आणि त्यांची पत्नी मधुलिका यांच्यावर शुक्रवारी अंत्यसंस्कार होणार आहेत. रावत, मधुलिका आणि अन्य सर्व मृतांचे मृतदेह मद्रास रेजिमेंट सेंटर येथे आणण्यात आले. दरम्यान, त्यातील एका अ‍ॅम्ब्युलन्सला अपघाताला सामोरे जावे लागले आहे. हा अपघात मेट्टूपलयम येथे झाला.
बिपीन रावत यांच्यासह सर्व मृतांचे पार्थिव आज सकाळी वेलिंग्टन येथून मद्रास रेजिमेंटल सेंटर येथे आणण्यात आले. तिथून हे पार्थिव सुलूर एअरबेस येथे नेण्यात येत असतानाच ताफ्यातील एका अ‍ॅम्ब्युलन्सला अपघात झाला. चालकाचे नियंत्रण सुटल्याने अ‍ॅम्ब्युलन्स रस्त्याच्या कडेला जाऊन संरक्षक भिंतीवर आदळली. अपघातात कोणतीही जीवितहानी झालेली नाही, असे सांगण्यात आले. या अपघाताबाबत अधिक तपशील अद्याप मिळालेला नाही.
दरम्यान, कुन्नूर येथे बुधवारी भारतीय हवाई दलाचे हेलिकॉप्टर कोसळून झालेल्या दुर्घटनेत बिपीन रावत, त्यांची पत्नी मधुलिका रावत यांच्यासह १३ जणांचा मृत्यू झाला. या सर्वांचे पार्थिव आज सायंकाळी सुलूर एअरबेस येथून विमानाने दिल्लीला पाठवले जाणार आहेत. आज सकाळी मद्रास रेजिमेंटल सेंटर येथे पार्थिव आणले गेल्यानंतर तिथे श्रद्धांजली वाहण्यात आली.
