धरणगाव (प्रतिनिधी) शहरातील गणाबाप्पा नगरात एका ठिकाणी आज सावकारांचे सहाय्यक निबंधक कार्यालयाच्या पथकाने पोलीस बंदोबस्तात धाड टाकून घराची झाडाझडती घेतली. यावेळी पथकाने तीन खरेदीखत जप्त केली आहेत. दरम्यान, या कारवाईमुळे शहरात प्रचंड खळबळ उडालीय.
या संदर्भात अधिक असे की, सहाय्यक निबंधक सहकारी संस्था तथा सावकारांचे सहाय्यक निबंधक कार्यालयाकडे रवींद्र पुंडलीक चौधरी यांच्याबाबत अवैध सावकारीच्या तीन तक्रारी प्राप्त झाल्या होत्या. त्यानुसार जिल्हा उपनिबंधक तथा सावकारांचे जिल्हा निबंधक संतोष बिडवाई यांनी घरझडतीसाठी एक पथक तयार केले.
या पथकात पथक प्रमुख म्हणून सहाय्यक निबंधक जे.बी.बारी तर सदस्य शिल्पा सिंहले (सहकार अधिकारी प्रथम श्रेणी, पारोळा), सुनील पाटील (सहकार अधिकारी प्रथम श्रेणी, पारोळा), सुनील महाजन (सहकार अधिकारी द्वितीय श्रेणी,अमळनेर) यांचा समावेश होता.
या पथकाने आज सकाळी साडे दहा वाजेच्या सुमारास पोलीस बंदोबस्तात धाड टाकली. साधारण दोन ते अडीच तास ही झाडाझडती चालली. या झाडाझडती तक्रारदारांचे तीन खरेदीखत आढळून आल्याचे कळते. दरम्यान, या संदर्भात सहाय्यक निबंधक जे.बी.बारी यांच्याशी संपर्क साधला असता त्यांनी सांगितले की, आज आम्ही घर झडती घेतली. त्यात तीन खरेदीखत आणि इतर कागदपत्रे जप्त केली आहेत. या बाबतचा अहवाल लवकरच जिल्हा निबंधकांकडे पाठवण्यात येईल.
आजचे हे धाडसत्र पोलिसांच्या बंदोबस्तात राबविण्यात आले. तसेच या संपूर्ण धाडसत्राचे व्हिडीओ चित्रीकरण केल्याचे देखील कळते. दरम्यान, आजच्या धाडीमुळे अवैध सावकारी करणाऱ्या लोकांमध्ये प्रचंड खळबळ उडाली आहे.
