रावेर (प्रतिनिधी) तालुक्यातील मोरगाव गावाजवळील एका शेतात हायप्रोफाईल जुगार अड्ड्यावर स्थानिक पोलिसांना सोबत घेत मध्यरात्री एलसीबीने छापेमारी केली. यावेळी १७ जणांना ताब्यात घेण्यात आले आहे. तर लाखोंच्या रोकडसह काही कार आणि दुचाकी पोलिसांनी ताब्यात घेतल्या आहेत. दरम्यान, अंधाराचा फायदा घेत साधारण १२ ते १५ जण घटनास्थळावरून फरार होण्यात यशस्वी झाल्याचे कळते.
या संदर्भात अधिक असे की, स्थानिक गुन्हे शाखेला रावेर तालुक्यात हायप्रोफाईल जुगार अड्डा सुरु असल्याची गोपनीय माहिती मिळाली होती. त्यानुसार मध्यरात्री ३ वाजेच्या सुमारास एलसीबीने स्थानिक पोलिसांना सोबत घेत मोरगाव जवळील एका शेतात धाड टाकली. यावेळी अचानक पोलीस आल्याचे दिसतात जुगारी पळवाट दिसेल तिकडे पळू लागले. तरी पोलिसांनी १७ जणांना ताब्यात घेतले. तर घटनास्थळावरून दीड लाखांची रोकड ६ फोर व्हीलर, ४ दुचाकी असा एकूण तब्बल ५५ लाखांचा ऐवज पोलिसांनी जप्त केला आहे. विशेष म्हणजे या हायप्रोफाईल जुगार अड्ड्याचा मालक हा एका बड्या राजकीय नेत्याचा समर्थक असल्याचे कळते. त्यामुळेच कारवाईमुळे रावेरसह जिल्ह्यात एकच खळबळ उडाली आहे. शेवटचे वृत्त हाती आले तेव्हा गुन्हा दाखल करण्याचे काम सुरु असल्याची माहिती पोलीस सूत्रांनी दिली आहे.
