नांदेड (वृत्तसंस्था) देवणी येथील शिवपार्वती लॉजच्या मालकाची डोक्यात हत्याराचे घाव घालून निर्घृण खून केल्याची खळबळजनक घटना बुधवारी (दि. २७) दुपारच्या सुमारास उघडकीस आली. अशोक मन्मथप्पा लुल्ले (६५), असे मयताचे नाव आहे.
देवणी येथे उदगीर रोडवरील अशोक लुल्ले यांच्या मालकीचा शिवपार्वती लॉज आहे. या लॉजवर ते मंगळवारी (दि. २६) रात्री नेहमीप्रमाणे मुक्कामासाठी गेले होते. कुटुंबियांनी बुधवारी सकाळपासूनच त्यांच्याशी संपर्क करण्याचा प्रयत्न केला. पण संपर्क होत नव्हता. यामुळे सकाळ पासून त्यांचे कुटुंबीय शोधाशोध करत होते. यानंतर नातेवाईकांनी बुधवारी दुपारी लॉजकडे येऊन पाहिले असता लॉजला बाहेरून कुलूप होते.
यामुळे दुसऱ्या मार्गाने जाऊन पाहिले असता लुल्ले हे रक्ताच्या थारोळ्यात पडल्याचे दिसले. प्रथमदर्शनी त्यांच्या डोक्यात लोखंडी हत्याराने जबर घाव घालून त्यांचा खून केला असल्याचे दिसून आले. पोलिसांनी घटनास्थळी आरोपींचा मग काढण्यासाठी श्वान पथकास पाचारण केले होते. तसेच ठसे तज्ज्ञांनाही बोलावण्यात आले होते. दरम्यान, लुल्ले यांचा खून कोणी आणि का केला?, हे अद्याप उघड झालेले नाही. पोलिसांनी कसून तपासाला सुरुवात केली आहे. घटनेची माहिती मिळताच बघ्यांनी लॉज बाहेर मोठी गर्दी केली होती. तसेच शहरातील व्यापाऱ्यांनी तत्काळ आपली दुकाने बंद केली.
