बोदवड (प्रतिनिधी) मंगळवार (दि.१२) रोजी दुपारी साडेतीन ते साडेचार वाजेच्या दरम्यान महात्मा फुले चौक बोदवड येथे कोतवाल गजानन सुरेश अहिरे (वय 33, शेलवड) यांना अवैध गौण खनिज वाहतूक करणाऱ्या आरोपींनी अडवून धमकी देऊन मारहाण करून दुखापत केल्याची घटना घडली होती. दरम्यान, कोतवाल अहिरे यांना मारहाण प्रकरणी बोदवड तहसीलमधील महसूल कर्मचाऱ्यांनी लेखनी बंद आंदोलन पुकारले आहे.
शेलवड येथील कोतवाल गजानन अहिरे हे तहसीलदार यांच्यासोबत दुपारी गौण खनिज कारवाई करण्याकरता जात होते. यावेळी बोदवड-जामनेर रोडवर जुने तहसील कार्यालयाजवळ गणेश झेरॉक्स समोर एक विना नंबरचा स्वराज कंपनीचा ट्रॅक्टर ट्रॉलीमध्ये मुरुमाने भरलेला दिसून आला. संबंधित चालकाकडे गौण खनिज वाहतुकीचा कोणताही परवाना नसल्याने सदर ट्रॅक्टर तहसीलदार यांनी ताब्यात घेऊन सोबत असलेल्या शिपाई समाधान यांच्यासोबत तहसील कार्यालयात सुरक्षित लावून दिला. त्यानंतर सदर ट्रॅक्टरचा मालक अनिल शेळके व चालक अरुण शेळके असे असल्याचे समजले. त्यानंतर पुढील कार्यवाही करण्यासाठी कोतवाल व तहसीलदार आपल्या पथकासह बोदवड येथील जामठी रोडवर नसीब चिकन सेंटरच्या समोर आले असताना त्यांना आणखी एक ट्रॅक्टर ट्रॉलीमध्ये मुरमने भरलेला आढळून आला. त्या ट्रॅक्टरचा नंबर (एमएच 19 ईए 4249) असा होता. त्यावरील चालकाकडे देखील गौण खनिज वाहतुकी बाबतचा कोणताही परवाना नसल्याने तो ट्रॅक्टर देखील तहसीलदार यांनी ताब्यात घेऊन सदरच्या ट्रॅक्टरवर कोतवाल यांना बसवून तुम्ही हा ट्रॅक्टर तहसील कार्यालयामध्ये कार्यवाहीसाठी घेऊन जा, असे आदेश दिलेत.
तहसीलदार यांच्या आदेशाप्रमाणे मुरमने भरलेला ट्रॅक्टर ताब्यात घेऊन कोतवाल गजानन अहिरे हे दुपारी चार वाजेच्या सुमारास महात्मा फुले चौफुलीवर घेऊन जात असताना दीपक तुळशीराम सपकाळ (वय 36 रा. बोदवड) यांनी ट्रॅक्टरला आडवे होऊन ट्रॅक्टर थांबवले व माझे ट्रॅक्टर घेऊन जाऊ नको असे सांगून तो सोडून देण्याबाबत दादागिरीच्या भाषेत बोलला. त्यावेळी कोतवाल यांनी सदरचा ट्रॅक्टर हा तहसीलदार साहेबांनी अवैधरित्या गौण खनिज वाहतूक करताना ताब्यात घेतला आहे व मी तो ट्रॅक्टर तहसील कार्यालयात बोदवड येथे घेऊन जात आहे, असे सांगितले. त्यावर दीपक सपकाळ याने कोतवाल अहिरे यांची पकडून खाली ओढले व मानेवर, कान व पाठीवर लाथा बुक्क्यांनी मारहाण केली व तू बोदवडमध्ये पाय ठेवलास तर तुला कापून टाकेल, अशी धमकी दिली. यावेळी लोकांची गर्दी जमा झाली होती.
यानंतर कोतवाल गजानन अहिरे यांच्या फिर्यादीवरून बोदवड पोलीस स्टेशनमध्ये शासकीय कामात अडथळा आणल्याप्रकरणी व विनाकारण मारहाण केल्याप्रकरणी व संशयित आरोपींनी सहा लाख १५ हजार किंमतीचा मुरूम असलेल्या ट्रॉलीसह ट्रॅक्टरचा नंबर क्रमांक (एमएच 19 ईए 4249) हा चोरून घेऊन व दुसरे ट्रॅक्टर सहा लाख पंधरा हजारचे ट्रॉलीसह अनिल शेळके यांच्या ट्रॅक्टर देखील चोरून घेऊन गेले. असा एकूण 12 लाख तीस हजाराचे ट्रॅक्टर चोरून व विनापरवानगी घेऊन गेल्याप्रकरणी संशयित आरोपी दीपक तुळशीराम सपकाळ व जंगलू मांगो मोरे या दोघांविरुद्ध भारतीय दंड संहिता 1860 नुसार 353 332 394 341 व 504 नुसार गुन्हा दाखल करण्यात आला असून पुढील तपास सपोनी अंकुश जाधव हे करीत आहेत. दरम्यान, कोतवाल अहिरे यांना मारहाण प्रकरणी बोदवड तहसीलमधील महसूल कर्मचाऱ्यांनी लेखनी बंद आंदोलन पुकारले आहे.
