चाळीसगाव (प्रतिनिधी) शहरातील पोतदार शाळेच्या पाठीमागील श्री अपार्टमेंटमधील बंद घराचे कडीकुलूप तोडून चोरट्यांनी रोख रकमसह सोन्या-चांदीचे दागिणे असा सुमारे ३ लाख ८२ हजारांचा ऐवज चोरून नेल्याची घटना २८ रोजी सकाळी ९ ते सायंकाळी ६ वाजेदरम्यान घडली. या प्रकरणी चाळीसगाव शहर पोलिसांत गुन्हा दाखल करण्यात आला आहे.
रघुविरसिंग रामसिंग राजपूत हे भारत वायर रोप येथे नोकरीस असून ते कुटुंबासह पोतदार शाळेच्या पाठीमागील श्री अपार्टमेंटच्या फ्लॅट नं. २०३ छायादिग्राम येथे राहतात. राजपूत यांची पत्नी व मुले महिनाभरापासून घरगुती कार्यक्रमानिमित्त राजस्थान येथे आपल्या मूळ गावी गेले आहेत. दरम्यान, २८ एप्रिल रोजी रघुविरसिंग राजपूत हे सकाळी ९ वाजता घराचा मुख्य दरवाजा व लोखंडी दरवाजा बंद करून कंपनीत गेले. सायंकाळी ६ वाजता घरी आले असता घराचा मुख्य दरवाजा व लोखंडी दरवाजाचे कुलूप तुटलेल्या अवस्थेत दिसले. तर बेडरूमधील कपाट उघडून चोरट्याने दागिणे व रोख रक्कम लांबवल्याचे दिसून आले. चोरट्यांनी रोख १५ हजार रूपये व सोन्या-चांदीचे दागिणे असा सुमारे ३ लाख ८२ हजार रूपयांचा ऐवज चोरुन नेल्याचे समोर आले आहे. याप्रकरणी रघुविरसिंग राजपूत यांनी दिलेल्या फिर्यादीवरून चाळीसगाव शहर पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे. तपास पोलीस उपनिरीक्षक भाऊसाहेब पाटील करत आहेत.
