ठाणे (वृत्तसंस्था) मीरा रोडमध्ये लिव्ह इन रिलेशनशिपमध्ये राहणाऱ्या ५६ वर्षीय प्रियकराने ३२ वर्षीय प्रेयसीची हत्या करून कटरने मृतदेहाचे लहान लहान तुकडे केल्याची धक्कादायक घटना उघडकीस आली आहे. पुरावा नष्ट करण्यासाठी आरोपीने तिच्या शरीराचे तुकडे शिजवून कुत्र्यांना खायला घातल्याची थरकाप उडवणारी माहिती पोलिस चौकशीत समोर आली आहे.
भाईंदर पूर्वेला गीतानगर फेज ७ आहे. येथील गीता आकाश दीप इमारतीत ७०४ क्रमांकाच्या फ्लॅटमध्ये मनोज साने (५६) व सरस्वती वैद्य (३२) हे दोघे तीन वर्षांपासून भाड्याने राहत होते. या सदनिकेतून दुर्गंधी येऊ लागल्याने रहिवाशांनी बुधवारी रात्री नयानगर पोलिसांना कळवले. पोलिस पथकाने घटनास्थळी धाव घेतली. त्याचवेळी लिफ्टमधून पळून चाललेल्या मनोज याला पकडले. फ्लॅटचा दरवाजा उघडला असता मानवी शरीराचे असंख्य तुकडे दिसले.
४ जूनला मनोज याने सरस्वतीची हत्या करून तिचे कटरने तुकडे केले. त्याने कोणत्या कारणाने व कशा प्रकारे हत्या केली? याबाबत तपास सुरू आहे. सहानी याचे रेशनचे दुकान असून त्याचे व सरस्वतीचे १० वर्षांपासून प्रेमसंबंध होते. दोघेही पती-पत्नीप्रमाणे राहत होते. परंतू गेल्या काही दिवसांपासून त्यांच्यात खटके उडत होते. त्यातूनच हे भयानक हत्याकांड घडले असल्याचा प्राथमिक अंदाज आहे.
दरम्यान, घरात प्रवेश केल्यावर सुरवातीला पोलिसांना तिचे पाय आढळले. धड आणि शीर नव्हते. त्याचा शोध घेतला असता घरातच ते कापून बकेट आणि पातेल्यात ठेवले होते. आरोपी मनोज याने तिची हत्या केल्यानंतर मृतदेहाचे असंख्य तुकडे केले. ते कुकर मध्ये शिवजले आणि गॅसवर भाजले होते. पुरावा नष्ट कऱण्यासाठी त्याने ते घरातील पातेल्यात आणि बादलीत दडवून ठेवले होते, अशीही माहिती पोलिसांनी दिली. ५ दिवसांपूर्वी ही हत्या केल्याची माहिती देखील समोर आली आहे.
