सोलापूर (वृत्तसंस्था) मुख्यमंत्र्याविरोधात टीका करताना अपशब्द वापरल्यामुळे भाजप नेते नारायण राणे यांच्याविरोधात सोलापुरातील बार्शी शहर पोलीस स्थानकात अदखलपात्र गुन्ह्याची नोंद करण्यात आली आहे.
शिवसेना नेते भाऊसाहेब आंधळकर यांनी नारायण राणे यांच्या विरोधात पोलिसांत तक्रार केली होती. भाजप नेते नारायण राणे यांचे नाव न घेता उद्धव ठाकरे यांनी त्यांवर टीका केली होती. त्या टीकेला प्रत्यूतर देताना नारायण राणे यांनी पत्रकार परिषद घेत मुख्यमंत्री उद्धव ठाकरे यांच्यावर जोरदार टीका केली.
आतापर्यंतच्या मुख्यमंत्र्यांनी आपल्या भाषणाच्या शैलीने स्वतःची प्रतिष्ठा राखली होती. निर्बुद्ध शिवराळ बरळणं म्हणजे मुख्यमंत्र्यांचं भाषण होतं, अशी टीका नारायण राणेंनी केली होती. दसरा मेळाव्यातील भाषणात एकाही विकास कामाचा उल्लेख केलेला नाही, कोरोनाचा उल्लेख नाही. जवळपास 43 हजार रुग्ण महाराष्ट्रात मृत्यूमुखी पडले. याची नैतिक जबाबदारी मुख्यमंत्र्यांवर येत नाही का? असा सवालही नारायण राणेंनी उपस्थित केला होता. मात्र मुख्यमंत्र्यावर टीका करताना पुळचट, निर्बुद्ध अशी शिवीगाळीची आणि दमदाटीची भाषा नारायण राणे यांनी वापरुन शिवसैनिकांचा अपमान केल्याचा आरोप बार्शीतील शिवसेना नेते भाऊसाहेब आंधळकर यांनी केला. त्यामुळे नारायण राणे यांच्याविरोधात कलम ५०४, ५०६ नुसार गुन्हा दाखल करण्यासंदर्भात तक्रारी अर्ज दिला होता. जर पोलिसांनी तात्काळ गुन्हा दाखल करुन योग्य कारवाई नकेल्यास , २ नोव्हेंबरला नारायण राणे यांच्या पुतळ्याचे दहन केले जाईल असा इशारा देखील भाऊसाहेब आंधळकर यांनी दिला होता. त्यांच्या या तक्रारीनंतर बार्शी शहर पोलीस स्थानकात भांदवि कलम ५०४, ५०६ नुसार गुन्ह्याची नोंद करण्यात आली आहे.
