पाटना (वृत्तसंस्था) एकीकडे लसीकरणाचा वेग सर्वच राज्यांमध्ये वाढविण्याची चर्चा सुरु असतानाच ११ वेळ कोरोना डोस (Corona Vaccination) घेतल्याचा दावा बिहारमधील ८४ वर्षाच्या वृद्धाने केला आहे. ब्रम्हदेव मंडल असे त्यांचे नाव आहे. ११ वेळ कोरोना डोस घेतल्याचा दावा करणारे मंडल हे चर्चेचा विषय ठरले असून, त्यांच्याविराेधात फसवणुकीचा गुन्हा दाखल करण्यात आला आहे.
ब्रह्मदेव मंडळ हे निवृत्त पोस्टमास्टर असून त्यांनी ११ वेळ कोरोनाची लस घेतल्याचा दावा केला होता. त्यांनी कोरोनाचा पहिला डोस गेल्या वर्षी १३ फेब्रुवारीला घेतला. त्यानंतर यंदा १३ मार्चला शेवटचा डोस पुरैनी प्राथमिक आरोग्य केंद्रात घेतला. १२ व्यांदा लस घेण्याचा प्रयत्न केला. परंतु, त्यांना यश मिळू शकले नाही. कोरोनाची लस घेतल्यानंतर गुडघेदुखी कमी झाल्याचे त्यांनी सांगितले. गुडघेदुखीतून कायमची सुटका मिळावी यासाठी त्यांनी वेगवेगळ्या ठिकाणांहून लसी घेतल्या.
ब्रह्मदेव यांच्या दाव्यानंतर आरोग्य प्रशासन खळबळून जागे झाले. पुरैनी प्राथमिक आरोग्य केंद्राच्या वैद्यकीय अधिकाऱ्यांनी पुरैनी पोलिस ठाण्यात तक्रार दाखल केली. त्यानुसार या व्यक्तीवर गुन्हा दाखल करण्यात आला असून तपास सुरू असल्याचे पोलिस अधिकारी दीपक चंद्र दास यांनी सांगितलं.
