पाळधी (प्रतिनिधी) येथील डॉ. बाबासाहेब आंबेडकर मागासवर्गीय शिक्षण प्रसारक मंडळ संचलित जीपीएस शैक्षणिक परिवारातील भाऊसाहेब गुलाबरावजी पाटील कला, वाणिज्य व विज्ञान उच्च महाविद्यालयातर्फे कनिष्ठ महाविद्यालयातील अकरावी कला, वाणिज्य व विज्ञान विभागातील विद्यार्थ्यांसाठी वार्षिक क्रीडा महोत्सवाचे आयोजन करण्यात आले होते.
कार्यक्रमाच्या उद्घाटन प्रसंगी संस्थेचे अध्यक्ष प्रताप गुलाबराव पाटील यांच्या हस्ते खाशाबा जाधव, मेजर ध्यानचंद त्यांच्या प्रतिमेचे पूजन करून मशाल प्रज्वलित करून संस्थेचे सदस्य दादासाहेब विक्रम पाटील, माध्यमिक विद्यालयाचे मुख्याध्यापक डी.डी. कंखरे, इंग्लिश मीडियमचे प्रिंसिपल सचिन पाटील, कनिष्ठ महाविद्यालयाचे प्राचार्य योगेश करंदीकर यांच्यासह सर्व प्राध्यापक वृंदानी मशाल संपूर्ण मैदानावर फिरवून नंतर तिची प्रस्थापना करून उद्घाटन करण्यात आले. महाविद्यालयातील ११ वी कला, वाणिज्य व विज्ञान विभागाच्या सर्व विद्यार्थ्यांसाठी विविध खेळाचे आयोजन करण्यात आले. त्यात व्हॉलिबॉल, कबड्डी, खो-खो, रस्सीखेच, क्रिकेट, गोळाफेक १०० मीटर रनिंग तसेच २०० मीटर रनिंग, दोरी उड्या इत्यादी खेळ घेण्यात आले विद्यार्थ्यांनी मोठ्या हिरिरीने त्यात सहभाग घेतला.
संस्थेचे अध्यक्ष प्रताप पाटील यांनी विद्यार्थ्यांना प्रेरणा देऊन, भविष्यात खेळाचे महत्त्व विद्यार्थ्यांना समजून सांगितले तसेच विविध स्पर्धांमध्ये विद्यार्थ्यांना सहभाग घेण्यासाठी प्रेरणा देऊन त्यांना सर्व ती मदत करण्याचे आश्वासन दिले. कनिष्ठ महाविद्यालयाचे प्राचार्य योगेश करंदीकर यांनी जागतिक फिरकीपटू शेन वॉर्न यांना श्रद्धांजली देऊन क्रीडा विश्वात झालेली हानी समोर बसलेल्या विद्यार्थ्यांमधून एकदा महान क्रिकेटपटू बनून भरून काढावी अशी सदिच्छा देऊन विद्यार्थ्यांना शुभेच्छा दिल्या.
कार्यक्रमाच्या यशस्वीतेसाठी महाविद्यालयातील क्रीडा शिक्षक राकेश धनगर, प्रा. मोनिका पाटील, प्रा, जयश्री सूर्यवंशी, प्रा. भुषण पाटील, प्रा. शुभांगी सोनवणे, प्रा. संजय बाविस्कर प्रा. स्वप्निल शिरसाळे, क्लर्क सचिन पाटील, बळीराम सपकाळे यांच्यासह GPS परिवारातील सर्व शिक्षक व शिक्षकेतर कर्मचारी यांनी परिश्रम घेतले.
