धरणगाव (प्रतिनिधी) येथील एकशे सात वर्षांची उज्ज्वल परंपरा असलेली शतकोत्तरी पी. आर. हायस्कूलच्या पाच एनसीसी कॅडेट्सना सन्मानाची मुख्यमंत्री शिष्यवृत्ती जाहीर झाली आहे. पी. आर. हायस्कूलच्या पाच कॅडेट्सनी मिळवलेला हा सन्मान म्हणजे पी. आर. हायस्कूल आणि धरणगावच्या शिरपेचात खोवलेला मनाचा तुरा आहे.
शतकोत्तरी पी. आर. हायस्कूलच्या राष्ट्रीय छात्रसेनेच्या ओम पाटील (सोनवद), साक्षी काटवे (खत्री गल्ली, धरणगाव), शीतल कट्यारे (खत्री गल्ली), अक्षदा लोहार (अग्निहोत्री गल्ली) आणि प्रतीक लोहार या पाच विद्यार्थ्यांना सन २०२०-२१ या वर्षासाठीची सन्मानाची मुख्यमंत्री शिष्यवृत्ती जाहीर झाली आहे.
विद्यार्थ्यांमध्ये भारतीय सैन्यदलात जाण्यासाठी आवड निर्माण व्हावी म्हणून जळगाव जिल्ह्यात मोजक्या शाळांमध्ये १८ महाराष्ट्र एनसीसी अर्थात राष्ट्रीय छात्र सेना ही विद्यार्थ्यांसाठीची राष्ट्रीय पातळीवरची शासकीय बटालियन आहे. त्यात धरणगाव तालुक्यात फक्त पी.आर. हायस्कूललाच हा मान मिळाला आहे. विशेष म्हणजे पी.आर.हायस्कूलमध्ये मुलं आणि मुलींचे अशा दोघांसाठी एनसीसी आहे.
छात्रसेनेतील गुणवत्ता, शालेय गुणवत्ता, खेळ, समाजसेवा, सामाजिक व राष्ट्रीय कार्यक्रमातील सहभाग, विविध स्पर्धा, साहसी कार्य, नेतृत्व गुण आदी गुणांचे मूल्यमापन करून ही निवड केली जाते. या कॅडेट्सना पी. आर. हायस्कूलचे चिफ ऑफिसर डी. एस. पाटील, यांचे मार्गदर्शन मिळाले आहे. पी.आर.हायस्कूल सोसायटीचे अध्यक्ष डॉ.अ रुण कुलकर्णी, उपाध्यक्ष वसंतराव गालापुरे, सचिव डॉ. मिलिंद डहाळे संचालक अजय पगरिया, मुख्याध्यापक डॉ. संजीवकुमार सोनवणे, प्राचार्य डॉ.टी.एस. बिराजदार, उपमुख्याध्यापक रामचंद्र सपकाळे, पर्यवेक्षक आशा सपकाळे यांनी या कॅडेट्सचा सत्कार केला.
