जळगाव (प्रतिनिधी) तालुक्यातील जळके ग्रामपंचायतीच्या सरपंचपदी चंद्रकांत गणपत पाटील यांची निवड झाली आहे. या निवडीनिमित्त चंद्रकांत पाटील यांचा विविध संस्था, संघटना आणि ग्रामस्थांतर्फे सत्कार करण्यात आला.
जळके ग्रामपंचायतीची पंचवार्षिक निवडणूक झाली. यात शिंदे गट प्रणित शिवसेना आणि भाजप पुरस्कृत शेतकरी विकास पॅनलचा दणदणीत विजय झाला. या पॅनलने सातपैकी सात जागा पटकावल्या. थेट सरपंच निवडीत चंद्रकांत पाटील यांचा भरघोस मतांनी विजय झाला. ते जळगाव कृषी उत्पन्न बाजार समितीचे माजी चेअरमन आणि प्रगतिशील शेतकरी आहेत. सर्व सहकाऱ्यांना विश्वासात घेऊन गावात मूलभूत सुविधा उपलब्ध करणे आणि गावाच्या सर्वांगिण विकासावर जास्तीत जास्त भर देण्यात येईल, असे आश्वासन पाटील यांनी ग्रामस्थांना दिले आहे.
