जळगाव (प्रतिनिधी) कर्ज देण्याचे आमिष दाखवून जळगाव शहरातील आदर्श नगरात राहणाऱ्या सेवानिवृत्त व्यक्ती आणि भडगाव शहरातील तरूण यांच्याकडून सुमारे ४५ लाख ५० हजार ८८१ आणि १ लाख ७५ हजार रूपयांची फसवणूक केली होती. या प्रकरणी सायबर पोलिसांनी दिल्ली व उत्तरप्रदेशातून तीन जणांना अटक केली आहे.
पुष्पेंदरकुमार रामदिन कनौजिया (वय-२९ रा. ऑफीसर कॉलनी, नवाबगंज, कानपूर ह.मु. गणेश चौक मंडावली दिल्ली), राहूल दिनेशकुमार पांडे (वय-२९ रा. विश्व बँक कॉलनी कानपूर, उत्तर प्रदेश), आणि रूपेश कुमार गिरीजानंद (वय ३३ रा. आचार्य निकेतन मयूर विहार, दिल्ली) अशी अटक केलेल्या तीन संशयित आरोपींची नावे आहेत.
याबाबत अधिक असे की, पहिल्या घटनेत प्रमोद कुमार मुगतलाल शाह (वय ७६ रा. आदर्श नगर) यांना १८ ऑगस्ट २०१९ ते ०२ डिसेंबर २०२० दरम्यान मितेश कुमार, अशोक कुमार सिंग आणि एमटीसिंग असे नावे सांगून प्रमोद शाह यांना मोबाईलवर मिनीस्ट्री ऑफ फायनान्स व आयकर विभाग भारत सरकार येथून बोलत असल्याचे सांगून पॉलीसीद्वोर ९४ लाख ६९ हजार ८६४ रूपये मिळण्याचे आमिष दाखवत सुमारे ४५ लाख ५० हजार ८८१ रूपये ऑनलाईन स्विकारून फसवणूक केल्याचे उघडकीला आले होते. तर दुसऱ्या घटनेत सैय्यद अलिम सैय्यद शौकत पटवे (वय-३४) रा. यशवंत नगर भडगाव जि.जळगाव या तरुणाला देखील १९ जानेवारी २०१९ ते ६ फेब्रुवारी २०१९ दरम्यान चार जणांनी वेगवेगळे नावे सांगून बजाज फायनान्स कंपनी पॉलीसीचे बनावट कागदपत्रे बनवून पॉलीसी लोन देण्याच्या नावाखाली सैय्यद अलिम यांच्याकडून वेळोवेळी १ लाख ७५ हजार रूपयांची फसवणूक केली. या दोन्ही घटनेबाबत सायबर पोलीस ठाण्यात दोन वेगवेगळे गुन्हे दाखल करण्यात आले होते.
सायबर पोलीस ठाण्याचे पोलीस निरीक्षक बळीराम हिरे यांनी तपासा दरम्यान फिर्यादी यांना आलेले ईमेल, मोबाईल क्रमांक, बँक खाते क्रमांक यांचा अभ्यास केला. त्यांनी पुष्पेदर कुमार रादिन कनौजिया हा निष्णन्न झाला. त्याला १२ जुलै २०२१ रोजी दिल्लीतून अटक केली. त्याची कसून चौकशी केली असता त्याने राहूल पांडे आणि रूपेश कुमार या दोघांची नावे सांगितली. त्यांना अटक करण्यासाठी पोउनि अंगत नेमाने, पाहेकॉ प्रविण वाघ, पो.ना. दिलीप चिंचोले, पो.कॉ. अरविंद्र वानखेडे, पो.कॉ. पंकज वराडे, पोकॉ. गौरव पाटील यांचे पथक असे १८ जुलै २०२१ रोजी उत्तरप्रदेशात रवाना केले. राहूल पांडे याला कानपूरहून तर रूपेश कुमार याला दिल्लीतून अटक केली. याप्रकरणी तिनही संशयित आरोपींविरोधात सायबर पोलीस ठाण्यात गुन्हा दाखल करण्यात आला. दरम्यान, तिघांना न्यायालयात हजर केले असता जिल्हा व सत्र न्यायालयाने २७ जुलै पर्यंत पोलीस कोठडी देण्यात आली आहे.
