अडावद, ता. चोपडा (प्रतिनिधी) येथून जवळच असलेल्या लोणी येथील ३५ वर्षीय शेतमजूर खर्डी शिवारातील एका शेतात केळी लागवड करत असताना आज दुपारी २ वाजेच्या सुमारास वीज कोसळून जागीच गतप्राण झाल्याची दुर्दैवी घटना घडली. यामुळे पंचक्रोशीत हळहळ व्यक्त होत आहे.
चोपडा तालुक्यातील लोणी येथील शेतमजूर शिवाजी चैत्राम कोळी (वय ३५) हे १५ रोजी खर्डी शिवारातील इच्छापूर बेले शिवारातील शेतात मजुरीने केळी खोडाची लागवड करण्यासाठी गेले होते. दुपारी २ वाजेच्या सुमारास अचानक वादळ वाऱ्यासह विजांचा गडगडाट सुरू झाला. याचवेळी शिवाजी कोळी यांच्या अंगावर वीज कोसळल्याने ते जागीच गतप्राण झाले.
यानंतर त्यांना अडावद प्राथमिक आरोग्य केंद्रात दाखल केले होते. तेथून चोपडा येथील उपजिल्हा रुग्णालयात हलवण्याच्या सल्ला देण्यात आला. तर उपजिल्हा रुग्णालयातील वैद्यकीय अधिकारी डॉ. सुरेश पाटील यांनी मृताची उत्तरीय तपासणी करून मृतदेह नातेवाईकांच्या ताब्यात दिले. रात्री १० वाजता शोकाकुल वातावरणात शिवाजी कोळी यांच्यावर अंत्यसंस्कार करण्यात आले. त्यांच्या पश्चात पत्नी, २ मुली, आई-वडील, २ भाऊ असा परिवार होता. घरातील कर्ता पुरुष नैसर्गिक आपत्तीने गतप्राण झाल्याने सर्वत्र हळहळ व्यक्त होत आहे. याप्रकरणी अकस्मात मृत्यूची नोंद करण्यात आली आहे.
