जळगाव (प्रतिनिधी) शेअरमार्केटमधील ट्रेडींगमध्ये गुंतवणुकीचे अमिष दाखवित महिलेची ऑनलाईन ठगांनी १ कोटी ५ लाख २३ हजार रुपयांत ऑनलाईन फसवणूक करणाऱ्यांना सायबर पोलिसांनी तांत्रिक विश्लेषणावर तपासचक्रे फिरवित अटक केली. मुकेश पिता सुभाष (वय २६), अंकुश पिता सतपाल (वय २९, दोघे रा. नादोरी, तहसील भूना, जि. फतेहाबाद, हरियाणा) यांना हरियाणातून तर दिपांकर गौतम राजेंद्र (वय २९, रा. भायखळा पश्चिम), नूरमोहम्मद अब्दुल रशिद बगे (वय २४, मूळ रा. महाड, जि. रायगड, ह. मु. नागपाडा, मुंबई) असे अटकेतील संशयितांची नावे आहे. त्यांच्याकडून ११ लाख १० हजार रुपयांची रोकड जप्त करण्यात आली असून ती पोलीस अधीक्षक यांच्या हस्ते सोनल भिमराव उपलपवार यांच्या स्वाधीन करण्यात आली.
शहरातील सोनल भिमराव उपलपवार यांना शेअर ट्रेडींगमध्ये गुंतवणुक केल्यास तुम्हाला मोठ्या प्रमाणावर नफ्याचे अमिष दाखविले. त्यानुसार वेबसाईटवर रजिस्ट्रेशन करुन त्यांना मोबाईलमध्ये शेअर ट्रेड्रींगचे अॅप्लिकेशन इंन्स्टॉल करण्यास सांगितले. त्यानंतर महिलेने केलेल्या गुंतवणुकीवर त्यांना मोठ्या प्रमाणात नफा दिला गेला. त्यामुळे महिलेने १ कोटी ५ लाख रुपयांची रक्कम त्यामध्ये गुंतविली. परंतू महिलेला हा नफा केवळ डिजीटल वेबसाईटवर आणि मोबाईलच्या अॅप्लिकेशनमध्ये दाखविला जात होता.
दरम्यान, सोनल उपलपवार या गुंतवलेली रक्कम काढत असतांना त्यांना पुन्हा काही पैसे भरल्यानंतरच तुम्हाला ती रक्कम काढता येईल असे ऑनलाईन ठगांनी त्यांना सांगितले. तसेच विविध कारणे सांगून सोनल उपलपवार यांनी १ कोटी ५ लाख २३ हजार ३४१ रुपयात ऑनलाईन फसवणूक केली होती. याप्रकरणी सायबर पोलिसात ऑनलाईन ठगांविरुद्ध गुन्हा दाखल करण्यात आला होता.
हरियाणासह मुंबईतून आवळल्या मुसक्या गुन्हा दाखल झाल्यानंतर तांत्रीक माहितीच्या आधारावर विश्लेषण करीत तपासधिकारी पोलीस निरीक्षक निलेश गायकवाड दिगंबर थोरात, सफौ देवेंद्र जाधव, पोहेकॉ दिलीप चिंचोले, शिवनारायण देशमुख, दीपक सोनवणे या पथकाने संशयित मुकेश सुभाष, अंकुश सतपाल यांना हरियाणातून तर दिपांकर गौतम राजेंद्र, नूरमोहम्मद अब्दुल रशिद बगे या दोघांच्या मुंबईतून मुसक्या आवळल्या.
महीलेला ऑनलाई न गंडविल्यानंतर संशयित हे फसवणुकीची रक्कम ही वेगवेगळ्या बँक खात्यावर स्विकारुन त्या बँकेतून विड्रॉल करीत होते. तोच तपासाचा धागा गवसत सायबर पोलिसांच्या पथकाने संशयितांना अटक केली. तसेच अटकेतील संशयितांकडून ११ लाख १० हजारांची रोकड जप्त करण्यात आली. ती रोकड तक्रारदार सोनल भिमराव उपलपवार यांना पोलीस अधीक्षक डॉ. महेश्वर रेड्डी यांच्या हस्ते देण्यात आली.Q
