चोपडा (प्रतिनिधी) तालुक्यातील विरवाडे-मालापूर रस्त्यावर एका बारा वर्षीय मुलीला शेतात नेत अत्याचार करून तिची दगडाने ठेचून हत्या करण्यात आल्याची संतापजनक घटना शनिवारी उघडकीस आली. पिडीतेच्या लहान बहिणीने हा प्रकार गावकऱ्यांना सांगितल्यानंतर ही घटना उघडकीस आली. आरोपीला पोलिसांनी अटक केली आहे. घटनेची माहिती मिळताच जिल्हा पोलीस अधीक्षक डॉ. महेश्वर रेड्डी यांनी घटनास्थळी धाव घेत माहिती जाणून घेतली.
दि. ७ रोजी तालुक्यातील एका गावात घडलेल्या या घटनेने संपूर्ण तालुका हादरला आहे. दोन्ही बहिणी शेतात कामाला गेल्या होत्या. कामावरून मालापूरकडून दोन्ही बहिणी घरी परत येत होत्या. यावेळी मयत १२ वर्षीय मुलीला २५ वर्षीय संशयित आरोपीने शेतात ओढून नेले. तेथे तिच्यावर त्याने अत्याचार केला. त्यानंतर तिची दगडाने ठेचून खून केल्याची घटना ७ रोजी सायंकाळी ५ वाजेच्या सुमारास घडली. हत्येनंतर आरोपीने अल्पवयीन मुलीला विवख घटना स्थळावरून १०० फूट ओढत नेत कापसाच्या शेतात फेकून दिल्याचे दिसून आले.
लहान बहिणीने उजेडात आणली घटना !
संशयित आरोपीने मयत मोठ्या बहिणीला शेतात ओढून नेल्याचे तिच्या सोबत असलेल्या १० वर्षीय लहान बहिणेने पाहिले. त्यानंतर ती गावात येऊन तिने आरडाओरड करुन घडलेली घटना ग्रामस्थांना सांगितली. त्यानंतर मुलीला घेऊन ग्रामस्थ त्या शेतातकडे निघाले. शोध घेतल्यानंतर घटनास्थळी पोहोचल्यावर ग्रामस्थांना अल्पवयीन मुलीची हत्या झाल्याचे दिसून आले.
एलसीबीने संशयिताला घेतले ताब्यात; वरिष्ठ अधिकारी दाखल !
या घटनेनंतर पोलिसांनी वेगाने तपास चक्र फिरवले. तर जळगाव येथील एलसीबीचे पथक घटनास्थळी दाखल झाले. त्यानंतर मिळालेल्या माहितीच्या आधारे विरवाडे ते आडगाव रस्त्यावर संशयिताला अटक करण्यात एलसीबीला यश आले. रात्री उशिरापर्यंत त्याची ओळख पटवण्याचे काम पोलीस करत होते. दरम्यान, घटनेची माहिती मिळताच जिल्हा पोलीस अधीक्षक डॉ. महेश्वर रेड्डी हे स्वतः वरिष्ठ अधिकाऱ्यांसोबत घटनास्थळी पोहोचले होते. यावेळी चोपडा उपविभागीय पोलीस अधिकारी कुणाल सोनवणे, पोलीस निरीक्षक मधुकर साळवे, पोलीस उपनिरीक्षक जितेंद्र जितेंद्र वल्टे यांच्यासह शहर पोलिसांनी घटनास्थळी धाव घेतली. रात्री उशिरापर्यंत घटनास्थळी पोलीस ठाण मांडून होते. या वेळी लोकनियुक्त सरपंच विशाल म्हाळके, पोलीस पाटील महारू कोळी व ग्रामस्थही घटनास्थळी उपस्थित होते.
