अमळनेर (प्रतिनिधी) – जिल्ह्यातील मुलीचे नाव घेण्याच्या कारणावरून अमळनेर शहरात दोन गटांत हाणामारी झाल्याची घटना ७ ऑगस्टला दुपारी सुमन केमिस्ट्री क्लासेसजवळ तसेच ८० फुटी रस्त्यावरील नायरा पेट्रोल पंपाजवळ घडली. या घटनेत दोन्ही गटातील काही जणांना दगड व धारदार शस्त्राने मारहाण करून जखमी करण्यात आले. याप्रकरणी दोन्ही गटांतील एकूण १४ जणांविरुद्ध अमळनेर पोलिसांत गुन्हे दाखल करण्यात आले आहेत.
पहिल्या गटातर्फे चेतन शिवाजी देसले (रा. सार्वजनिक बांधकाम विभागासमोर, ढेकू रोड) यांनी फिर्याद दिली आहे. त्यानुसार नमन नीळकंठ पाटील व गौरव अशोक बोरसे यांनी चेतन यांना ८० फुटी रस्त्यावरील नायरा पेट्रोल पंपाजवळ बोलावून घेतले. तेथे धवल राजा राजपूत, वेदांत पाटील, युवराज संगेले, तुषार माने, गौरव बोरसे, हसनेन (पूर्ण नाव माहीत नाही), साद पिंजारी, सुमित योगेश राजपूत व लोकेश राजपूत उपस्थित होते. या वेळी ‘तू मुलीचे नाव का घेतो, तू दादा झाला आहे का?’ असे म्हणत चेतन यांना लाथाबुक्क्यांनी मारहाण करून खाली पाडल्याचे फिर्यादीत नमूद आहे. त्यानंतर दुचाकीवर बसवून त्यांना सुमन केमिस्ट्री क्लासेसजवळ नेले. तेथे पुन्हा मारहाण करून हात-पाय जोडायला लावले आणि ‘सॉरी’ म्हणतानाचा व्हिडिओ मोबाईलमध्ये रेकॉर्ड केला. याचवेळी सुमित व लोकेश राजपूत यांनी डोक्यात दगड मारून जखमी केल्याचे तसेच जीवे मारण्याची धमकी दिल्याचे फिर्यादीत म्हटले आहे. या प्रकरणी विविध कलमांनुसार गुन्हा दाखल करण्यात आला आहे. तपास हे. कॉ. विनोद भोई करत आहेत.
तर, दुसऱ्या गटातर्फे लोकेश योगेश राजपूत (रा. परांजपे चाळ, स्टेशन रोड) यांनी फिर्याद दिली आहे. त्यानुसार त्यांचा लहान भाऊ धवल हा सुमन केमिस्ट्री क्लासेसजवळ उभा असताना राजपाल देसले, चेतन देसले, जयपाल देसले, वाल्मीक देसले व दिनेश देसले यांनी त्याला मारहाण केली. या वेळी राजपाल देसले यांनी लोकेश यांना मागून पकडून ठेवले. चेतन यांनी धारदार शस्त्र जयपाल यांच्या हातात दिले व जयपाल यांनी कानाजवळ वार केल्याचे फिर्यादीत नमूद आहे. तसेच दिनेश यांनी डाव्या डोळ्यावर बुक्का मारला, तर वाल्मीकने धारदार शस्त्राने डाव्या दंडावर वार करून लाथाबुक्क्यांनी मारहाण केल्याचे म्हटले आहे. या फिर्यादीवरून विविध कलमांनुसार गुन्हा दाखल करण्यात आला आहे. या प्रकरणाचा तपास हे.कॉ. अशोक साळुंखे करत आहेत.
