नवी दिल्ली(वृत्तसंस्था) : सध्या गांधी परिवाराची नॅशनल हेराल्ड प्रकरणात ईडी चौकशी सुरू आहे. याच दरम्यान देशात वाढती महागाई आणि बेरोजगारीच्या विरोधात काँगेसने देशव्यापी आंदोलन करणार आहे. राजधानी दिल्लीमध्ये काँग्रेसने पंतप्रधान निवास आणि राष्ट्रपती भवनाला घेराव घालण्याचा इशारा यावेळी देण्यात आलेला आहे.
दिल्लीतील जंतरमंतर वगळता सर्व ठिकाणी कलम १४४ लागू करण्यात आलेले आहे. तर या आंदोलनाबद्दल काँग्रेस ऑफिसच्या बाहेरही पोस्टर्स लावण्यात आले आहेत. या आंदोलनाच्या आधी राहुल गांधी पत्रकार परिषद घेतील. त्यानंतर राहुल गांधी काँग्रेसच्या खासदारांसोबत संसद भवन ते राष्ट्रपती भवन असा मोर्चा काढतील. तर प्रियंका गांधी पक्षाचे नेते आणि कार्यकर्त्यांसोबत काँग्रेस मुख्यालय ते पंतप्रधान निवास असा मोर्चा काढतील. काँग्रेसचे माजी अध्यक्ष राहुल गांधी यांनी आपल्या ईडी चौकशीवरून मोदी सरकारवर चांगलाच हल्लाबोल केला आहे. आपण पंतप्रधान मोदींना घाबरत नाही आणि धमकावून आपला आवाज दाबला जाऊ शकणार नाही.
ईडीने आर्थिक घोटाळ्याप्रकरणी बुधवारी दिल्लीतलं नॅशनल हेराल्ड कार्यालयातला यंग इंडियन कंपनीचा परिसर सील केला आहे. तर काँग्रसेने दावा केलाय की, दिल्ली पोलिसांनी त्यांचं मुख्यालय आणि सोनिया गांधी, राहुल गांधीच्या घराभोवती वेढा घातला आहे.
