जालना (वृत्तसंस्था) काँग्रेसचे खासदार राजीव सातव यांची प्रकृती नाजूक असून त्यांच्या शरीरात सायटोमॅगीलो हा नवीन व्हायरस आढळला आहे. त्यांच्या शरीरात या विषाणूचा संसर्ग झाला असून त्यांची प्रकृती नाजूक झाली आहे. मात्र, त्यांच्या उपचारासाठी तज्ञ डॉक्टरांचे पथक तैनात असून उद्या आपण जहांगीर रुग्णालयात भेट देणार असल्याचं आरोग्यमंत्री टोपे यांनी सांगितले.
आरोग्य मंत्री राजेश टोपे म्हणाले, ” राजीव सातव यांची प्रकृती थोडी नाजूक आहे. डॉक्टर शर्थीचे प्रयत्न करत आहेत. ते व्हेंटिलेटरवर आहेत. राजीव सातव बरे होत असताना त्यांच्या शरीरात सायटोमॅजिलो हा नवा व्हायरस सापडला. त्यांच्यावर उपचार सुरु असून इन्फेक्शनही झालं आहे. त्यामुळे परिस्थिती थोडी नाजूक आहे. पण डॉक्टर पूर्णत: प्रयत्न करत आहेत, काळजी घेत आहेत. सर्वकाही उपचार केले जात आहेत. तज्ज्ञातले तज्ज्ञ डॉक्टर बोलावून आपल्या मराठवाड्यातील या सुपुत्रावर उपचार केले जात आहेत. मुंबई-पुण्यातील तज्ज्ञ डॉक्टरांमार्फत सातव यांच्यावर उपचार सुरु आहेत. मी स्वत: उद्या त्यांना भेटण्यासाठी जात आहे. त्यांची काळजी घेण्यासाठी आवश्यक त्या सर्व उपाययोजना केल्या जात आहेत”
म्युकरमायकोसिस रुग्णांसाठी देण्यात येणाऱ्या उपचारांबाबतीत काही निर्णय घेण्यात आल्याची माहिती राजेश टोपे यांनी दिली. म्युकरमायकोसिस रुग्णांसाठी ४ ते ५ प्रकारचे डॉक्टर लागतात आणि त्यासाठी महात्मा फुले जन आरोग्य असलेल्या मोठ्या हॉस्पिटलमध्ये या रुग्णांसाठी उपचार करण्यात येणार आहेत. ज्या हॉस्पिटलमध्ये नाक, कान, घास, ब्रेन तज्ञ असतील असे ठराविक हॉस्पिटल निवडले जाणार आहेत. म्युकरमायकोसिस पेशंटसाठी वेगळे वॉर्ड तयार केले असून, वेगळी टीम करण्यात येणार आहे. म्युकरमायकोसिस रुग्णाला लागणारे अनफोटेरेसिन ‘बी’ चे एक लाख इंजेक्शनचे टेंडर काढण्यात आले असून आज पाच वाजेपर्यंत फायनल करण्यात येईल, अशी माहितीही राजेश टोपे यांनी दिली आहे.
