भुसावळ (प्रतिनिधी) कोरोना संक्रमित रुग्णांकडून कोविड रुग्णालयातर्फे उपचारासाठी शासकीय दरानुसार बिल न आकारता रुग्णांची लूटमार होत आहे. पण भुसावळ येतील भारतीय जनता पार्टी संचलित कोरोना योद्धा सहाय्य समितीच्या बिल पडताळणी समितीच्या पाठपुराव्याने रुग्णाला १८ हजार ८०० रुपयाचा निधीचा चेक परत मिळाला आहे.
या बाबत सविस्तर वृत्त असे की, भुसावळ येथील रहिवासी कौलसिंग पाटील आणि वत्सला पाटील हे कोरोना संक्रमण झाल्याने १ एप्रिल २०२१ ते ५ एप्रिल २०२१ या काळात श्री मल्टीस्पेशालीटी क्रिटिकल केअर सेंटर संचलित श्री रीदम कोविड केअर हॉस्पिटल, भुसावळ मध्ये भरती होते. उपचारांती कौलसिंग पाटील हे मयत झाले तर वत्सला पाटील या सुखरूप घरी आल्या. या ५ दिवसामधील त्यांचे बिल अनुक्रमे ५० हजार ७७१ रुपये आणि ४० हजार ९०१ रुपये असे होते. या दोघांचे ९१ हजार ४७२ रुपये बिल अदा करण्यात आले. घरचे सर्व सोपस्कार पार पडल्यावर त्यांनी भारतीय जनता पार्टी संचलित कोरोना योद्धा सहाय्य समितीचे केतन पाटील यांच्याशी वाढीव बिलासंबंधी विचारणा केली असता त्यांनी लेखी तक्रार कोरोना योद्धा सहाय्य समितीचे अध्यक्ष डॉ. नितु पाटील यांच्याकडे करत सर्व कागदपत्रे सोबत दिली.
डॉ. नितु पाटील यांनी सदर वाढीवबील अर्जाचा पाठपुरावा जिल्हाधिकारी आणि जिल्हा शल्य चिकित्सक यांच्याकडे सुरु केला. याबाबतील भुसावळ तालुक्याचे आ. संजय सावकारे यांना पण अवगत करत त्यांनी पण आक्षेप निवारण समिती जळगाव यांच्याशी चर्चा करत बिल पडताळणी बद्दल सुचविले. सरतेशेवटी कोरोना योद्धा सहाय्य समितीचे केतन पाटील यांच्या उपस्थिती पाटील परिवाराला ९ हजार रुपये आणि ९ हजार ८०० रुपये या रकमेचे दोन चेक परत करण्यात आले. याबद्दल पाटील परिवाराने भारतीय जनता पार्टी संचलित कोरोना योद्धा सहाय्य समितीचे आभार मानले आहे.
बिल पडताळणीसाठी आवाहन
“श्री मल्टीस्पेशालीटी क्रिटिकल केअर सेंटर संचलित श्री रीदम कोविड केअर हॉस्पिटल बद्दल अजूनही ३,४ तक्रारीवर पाठपुरावा सुरु आहे. ज्या रुग्णांना वाढीव बिलासंबंधी काही तक्रार असल्यास त्यांनी कोरोना योद्धा सहाय्य समितीच्या कोणत्याही सदस्याशी संपर्क साधावा. भारतीय जनता पार्टी याबद्दल पाठपुरावा करणार.” असे भुसावळ कोरोना समिती अध्यक्ष डॉ. नितु पाटील यांनी सांगितले.
