जळगाव (प्रतिनिधी) शहरातील नेहरु चौकात असलेली एका राष्ट्रीयकृत बँकेतील कर्मचाऱ्यांचे कोरोना अहवाल पॉझेटिव्ह आल्याने शहरात खळबळ उडाली आहे. या बँकेतील आठ कर्मचारी पॉझेटिव्ह आले आहेत.
जळगाव जिल्ह्यात कोरोनाची दूसरी लाट आली आहे. त्यात शहरातील नेहरु चौकात असलेली एका राष्ट्रीयकृत बँकेचे संपूर्ण कर्मचारी कोरोनाबाधित झाले असल्याच्या वृत्ताने शहरात एकच खळबळ उडाली. सकाळी बँक उघडण्याच्या वेळात बँक उघडली अर्धा तास होवून देखील बँकत एक ही कर्मचारी उपस्थित नव्हता, बँकेचा दरवाजा खुला आणि सुरक्षारक्षक देखील नसल्याने बँकेत येणारे ग्राहक हे दृश्य पाहून आश्चर्य व्यक्त करत होते. विचारपूस करण्यासाठी कोणी नसल्याने पुन्हा ग्राहक जात होते. मात्र थोड्याच वेळात बँकेतील कर्मचारी पॉझेटिव्ह आले असल्याचे माहिती समजताच बँकेत आलेले नागरिक व बँकेच्या आजूबाजुच्या परिसरातील व्यवसायिकांमध्ये एकच धावपळ उडाली. काही वेळासाठी बँक रामभरोसे होती नंतर काही वेळानंतर सुरक्षारक्षक तसेच बँकेचे दोन कर्मचारी बँकेच्या प्रवेशद्वारा बाहेर उभे होते. महापालिका प्रशानाचे कर्मचारी येवून बँक व बाजूला असलेले एटीएमचे द्वार बंद करण्यात आले होते. याबाबत कर्मचाऱ्यांशी संवाद साधला असता केवळ आठ कर्मचारी पॉझेटिव्ह आले असल्याचे त्यांनी सांगितले.
ही बँक मुख्य बाजारपेठेत असल्याने बँकेत व्यवसायिकांचे पैसे काढणे ते भरणाच्यांची मोठी गर्दी असते. त्यामुळे गेल्या चार पाच दिवसात बँकेत आर्थिक कामानिमित्त आलेले ग्राहक व नागरिक बँकेतील कर्मचाऱ्यांशी संपर्कात आले. त्यामुळे संपर्कातील नागरिकांना देखील कोरोनाची लागण होण्याची दाट शक्यता असून असे झाल्याने शहरात अजून कोरोनाचा संसर्ग मोठ्या प्रमाणात पसरण्याची शक्यता वर्तवली जात आहे.
