सातारा (वृत्तसंस्था) छत्रपती उदयनराजे भोसले आणि संभाजीराजे या दोघांबाबत आक्षेपार्ह वक्तव्य केल्याप्रकरणी वंचित बहुजन आघाडीचे नेते डॉ. प्रकाश आंबेडकर आणि अ‍ॅड. गुणरत्न सदावर्ते यांच्याविरोधात साताऱ्यामध्ये अदखलपात्र गुन्हा दाखल करण्यात आला आहे.
‘दोन्ही राजांचा मराठा आरक्षणप्रश्न बंदला पाठिंबा असल्याचे वाचनात कुठेही आलेले नाही. एक राजा तर बिनडोक असल्याचे मी म्हणेन, तर दुसरे संभाजी राजे यांनी आरक्षणाबद्दल घेतलेली भूमिका बरोबर आहे. मात्र ते आरक्षणापेक्षा इतर गोष्टींवर अधिकभर देत असल्याचा आरोप प्रकाश आंबेडकर यांनी केला होता. एवढेच नव्हे तर, ज्या माणसाला राज्य घटना माहिती नाही. ‘आम्हाला आरक्षण मिळाले नाही, तर सर्वांचे आरक्षण रद्द करा’, अशी ते भूमिका मांडतात. त्यावरून त्यांना भाजपने राज्यसभेवर कसे पाठवले? हाच प्रश्न उपस्थित होतो’ असा टोला त्यांनी उदयनराजेंना लगावला होता. दुसरीकडे मराठा आरक्षणाचा मुद्दा सध्या चर्चेत आहे. याविषयावर बोलताना गुणरत्न सदावर्तेंनी देखील एका वृत्तवाहिनीवर खासदार छत्रपती संभाजीराजेंविरोधात आक्षेपार्ह वक्तव्य केले होते. यानंतर सकल मराठा समाज आणि करण गायकर यांच्या वतीने तक्रार दाखल करण्यात आली आहे.
