धरणगाव (प्रतिनिधी) पेट्रोल आणि डिझेलच्या किंमतीमध्ये दिवसेंदिवस होणारी वाढ पाहता आगामी युग हे इलेक्ट्रिक वाहनांचे असेल, हे वेगळं सांगायला नको. तसेच इलेक्ट्रिक वाहने ही प्रदूषण करणारी नसल्याने सरकारकडूनही त्यांच्या वापराला प्रोत्साहन दिले जात आहे. त्यामुळे धरणगाव पालिका प्रशासनाने पाचोरा पालिकेच्या धर्तीवर मोफत ‘ईव्ही चार्जिंग पॉइंट’ उभारावेत अशी मागणी होत आहे.
देशात वेगाने वाढणाऱ्या इलेक्ट्रिक वाहनांची संख्या दिवसेंदिवस वाढत आहे. परंतू सध्या लोक ईव्ही कार, दुचाकी खरेदी करणे टाळत आहेत. कारण त्यांना चार्जिंग स्टेशनच्या कमतरतेचा सामना करावा लागत आहे. परंतू पाचोरा पालिका प्रशासनाने इलेक्ट्रिक वाहनांना प्रोत्साहन मिळावे आणि शहरातील प्रदुर्षण कमी व्हावे म्हणून काही ठिकाणी ‘ईव्ही चार्जिंग पॉइंट’ उभारले आहेत. याच धर्तीवर धरणगावात इलेक्ट्रिक वाहन चार्जिंग स्टेशन उभारले पाहिजे, अशी मागणी होत आहे.
ईव्ही चार्जिंग पॉइंट ठरेल बैठकीचा कट्टा !
पाचोरा शहरात अनेक लोकं ‘ईव्ही चार्जिंग पॉइंट’ला येतात. त्यामुळे ते ठिकाण एकप्रकारे आता अनेकांचा बैठकीचा कट्टा झाला आहे. अनेक नागरिक तास-दोन तास या ठिकाणी येतात. एकमेकांसोबत गप्पागोष्टीसह दुचाकी देखील चार्ज होते. यामुळे लाईट बिल अनेकांना कमी येते. तसेच पालिकेने एक सुविधा दिल्याचा आनंद नागरिकांना होतो.
रूफटॉप सोलर ऊर्जा निर्मिती यंत्रणा बसविल्यास पालिकेच्या खर्चाची बचत !
धरणगाव नगर पालिकेने रूफटॉप सोलर ऊर्जा निर्मिती यंत्रणा बसविल्यास विजेच्या बिलाची समस्या देखील सुटू शकते. तसेच धरणगावात तीन ते चार ठिकाणी ईव्ही चार्जिंग पॉइंट सुरु करता येईल. दरम्यान, यामुळे शहरात इलेक्ट्रिक वाहनांची संख्या वाढू शकते. तसेच पालिकेच्या खर्चाची बचत होईल आणि नागरिकांना मोफत सेवा देतं येईल.
इलेक्ट्रिक वाहने ही प्रदूषण करणारी नसल्याने सरकारकडूनही त्यांच्या वापराला प्रोत्साहन दिले जात आहे. संकल्पना चांगली असून याबाबत पालकमंत्री गुलाबराव पाटील यांच्यासोबत चर्चा करेल. शासनाच्या कोणत्या योजनेतून ‘ईव्ही चार्जिंग पॉइंट’ला निधी मिळेल याची माहिती घेऊन लवकरच यावर सकारात्मक निर्णय घेण्याचा प्रयत्न करू. तसेच आपण धरणगाव शहर तालुक्यात आपण शंभर दीडशे अपंग बांधवाना ई-बाईक दिलेल्या आहेत. त्यांना देखील याचा उपयोग होईल.
– प्रतापराव पाटील (माजी जि.प. सदस्य)
पालकमंत्र्यांकडून विशेष निधीची मागणी करणार !
पालिकेच्या कोणत्या फंडातून हे काम करता येईल का?, याची चाचपणी केली जाईल किंवा पालकमंत्री गुलाबराव पाटील यांच्याकडून आम्ही विशेष निधी देखील मागू. लवकरच भाऊंची भेट घेऊन या विषयावर चर्चा करू !
– पप्पू भावे (माजी पालिका गटनेते)
