नागपूर (वृत्तसंस्था) विधानसभेचे विरोधी पक्षनेते देवेंद्र फडणवीस यांच्या काकी तथा माजी मंत्री आणि भाजपच्या ज्येष्ठ नेत्या शोभाताई फडणवीस यांना पुत्रशोक झाला आहे. देवेंद्र फडणवीस यांचे चुलत बंधू अभिजीत फडणवीस यांचं ह्दयविकाराच्या तीव्र झटक्यानं निधन झाले. ते ५४ वर्षाचे होते.
अभिजीत माधवराव फडणवीस यांचे आज सकाळी ९.३० वाजता निधन झाले. सध्या नागपुरात वास्तव्याला असलेले अभिजीत काही काळापासून आजारी असल्याची माहिती आहे. हृदय विकाराच्या झटक्याने नागपूरमध्ये त्यांची प्राणज्योत मालवली. नागपुरातच त्यांच्या पार्थिवावर अंत्यसंस्कार करण्यात येणार आहेत.
अभिजीत माधवराव फडणवीस हे जगदंबा राईस मिलचे भागीदार होते. भाजपच्या ज्येष्ठ नेत्या शोभाताई फडणवीस यांचे ते एकुलते एक सुपुत्र, तर विधानसभेचे विरोधीपक्ष नेते देवेंद्र फडणवीस यांचे चुलत बंधू होते. त्यांच्या पश्चात मातोश्री, पत्नी, पुत्र तन्मय फडणवीस असा परिवार आहे.
