धुळे (प्रतिनिधी) औद्योगिक वसाहतीतील भुखंडावर अतिरिक्त बांधकाम करण्यासह नकाशा मंजुर करण्यासाठी २५ हजार रुपयांची लाच स्विकारतांना खासगी सल्लागार अभियंता अहमद वफा अहमद हसन अन्सारी याला रंगेहात पकडण्यात आले आहे. धुळे लाच लुचपत प्रतिबंधक विभागाच्या पथकाने ही कारवाई केली आहे.
शहरातील रहीवासी असलेले तक्रारदार यांना अवधान एमआयडीसी येथील भुखंडावर अतिरिक्त बांधकाम करायचे आहे. त्यासाठी त्यांनी दि. ७ जून रोजी कार्यकारी अभियंता, एमआयडीसी अवधान, धुळे यांच्या कार्यालयात आवश्यक त्या कागदपत्रांची पुर्तता करुन ऑनलाईन अर्ज केला होता. तसेच चलनाव्दारे आवश्यक ती फी देखील भरलेली होती.
तक्रारदार यांनी हा अर्ज करुन तीन महीने होवुन देखील त्यांचा अतिरिक्त बांधकामाचा नकाशा मंजुर न झाल्याने ते काल (दि.६) अवधान येथील कार्यकारी अभियंता यांच्या कार्यालयाजवळ गेले होते. यावेळी तेथे सल्लागार अभियंता अहमद वफा अहमद हसन अन्सारी यांच्याशी त्यांची भेट झाली. त्यांनी तक्रारदार यांना या कार्यालयात आपली ओळख आहे. मी तुमचे बांधकाम मंजुरीचे काम या कार्यालयातुन करुन देतो. मात्र यासाठी २५ हजार रुपये लाच द्यावी लागेल, असे सांगितले.
परंतू तक्रारदार यांना लाच देण्याची इच्छा नसल्याने त्यांनी याबाबत धुळे लाच लुचपत प्रतिबंधक विभागाच्या कार्यालयात तक्रार दिली. या तक्रारीच्या अनुषंगाने अनुषंगाने पथकाने तातडीने पडताळणी केली. तेंव्हा सल्लागार अभियंता अन्सारी यांनी तक्रारदार यांच्याकडे अतिरिक्त बांधकाम मंजुरीचा नकाशा कार्यकारी अभियंता, एमआयडीसी अवधान, धुळे कार्यालयातुन मंजुर करुन देण्यासाठी २५ हजार रूपये लाचेची मागणी केल्याचे पंचासमक्ष निष्पन्न झाले. त्यानुसार पथकाने लागलीच कार्यकारी अभियंता, कार्यालयाजवळ सापळा रचला.
तक्रारदार यांनी सल्लागार अभियंता अन्सारी यांना २५ हजार रुपयांची लाच दिली. ती स्विकारतांना त्यांना एसीबीच्या पथकाने रंगेहात पकडले. याप्रकरणी तक्रारदार यांनी मोहाडी उपनगर पोलीस ठाण्यात दिलेल्या फिर्यादीवरुन सल्लागार अभियंता अन्सारी यांच्याविरुध्द भ्रष्टाचार प्रतिबंध अधिनियम सन १९८८ चे कलम ७ (अ) अन्वये गुन्हा दाखल करण्याचे काम उशीरापर्यंत सुरु होते.
ही कारवाई धुळे लाच लुचपत प्रतिबंधक विभागाचे पोलीस उपअधीक्षक अभिषेक पाटील यांच्या मार्गदर्शनाखाली पोलीस निरीक्षक हेमंत बेंडाळे, मंजितसिंग चव्हाण, रुपाली खांडवी यांच्यासह पथकातील कर्मचारी राजन कदम, शरद काटके, मकरंद पाटील, प्रशांत बागुल, संतोष पावरा, गायत्री पाटील, रामदास बारेला, प्रविण पाटील, प्रविण मोरे, मुकेश अहिरे, सुधीर मोरे, जगदीश बडगुजर यांनी केली आहे.याप्रकरणी मोहाडीनगर पोलीस ठाण्यात भ्रष्टाचार प्रतिबंध कायदा कलमान्वये गुन्हा दाखल करण्याचे काम रात्री उशीरापर्यंत सुरु होते.
