लखनऊ (वृत्तसंस्था) बहीण भावाच्या नात्याला काळीमा फासणारी एक घटना घडली आहे. उत्तर प्रदेशमधून भयंकर घटना समोर आली आहे. एका भावानेच आपल्या बहिणीच्या डोक्यात गोळी झाडत तिची हत्या केली. गोळी मारल्यानंतर मरणाच्या आधी बहीण तडफडत होती. मात्र भाऊ तिथेच उभा राहून हसत राहिला. याप्रकरणी पोलिसांनी आरोपी भावाला अटक केली आहे.
मिळालेल्या माहितीनुसार, ही घटना मेरठच्या सरधना येथील आहे. रात्री उशिरा घरात सर्व झोपलेले असताना आरोपी आरिफने हे धक्कादायक कृत्य केलं आहे. त्यानं सांगितलं की, त्यानं याआधीही आपल्या बहिणीला मारण्याचा प्रयत्न केला आहे. जेव्हा मुलगी मरणाच्या दारात होती आणि तडफडत होती, तेव्हा आरोपी तिला म्हणत होता की मी तुला किती वेळा समजावलं. मात्र, तू आमचं ऐकलं नाहीस आणि आमची बदनामी करत राहिली. आरोपीनं म्हटलं, की आमच्या कुटुंबाची तिच्यामुळे भरपूर बदनामी होत होती.
मेरठच्या सरधना ठाण्याच्या क्षेत्रातील मोहल्ला इस्लामाबादमध्ये आपल्या मामाकडे राहणाऱ्या सिमरनचं आपल्याच शेजारी राहणाऱ्या एका युवकासोबत अफेअर होतं. या मुलीला आपल्या प्रियकरासोबत लग्न करायचं होतं. मात्र, कुटुंबीयांचा याला विरोध होता. जेव्हा कुटुंबीयांना याबाबत माहिती झाली तेव्हा त्यांनी मुलीवर नजर ठेवण्यास सुरुवात केली आणि तिचं घरातून बाहेर जाणं बंद केलं. मात्र, तरीही ही मुलगी मोबाईलवरुन आपल्या प्रियकरासोबत बोलत असे. हत्येच्या ३ दिवस आधी तिच्या लहान भावानं तिला प्रियकरासोबत पाहिलं होतं. यानंतर त्याला प्रचंड राग आला आणि त्यानं आपल्या बहिणीला मारण्याचा प्लॅन केला.
मुलीला रक्ताच्या थारोळ्यात पडलेलं पाहून सर्वच हैराण
आरोपीनं जेव्हा बहिणीची हत्या केली तेव्हा ती झोपलेली होती. गोळीचा आवाज आणि सिमरन ओरडल्यानं घरचे जागे झाले. टेबलवर आपल्या मुलीला रक्ताळलेल्या अवस्थेत पाहून सगळेच हैराण झाले. आरिफ शेजारीच उभा होता, त्याच्या हातात पिस्तुल होता अन् तो हसत होता. घटनेची माहिती मिळताच रात्री दीड वाजता पोलीस याठिकाणी पोहोचले आणि मुलीला रुग्णालयात दाखल केलं. पोलिसांनी बहिणीच्या हत्येप्रकरणी आरिफला अटक केली.
