भुसावळ, (प्रतिनिधी) शहाबाज देशपांडे : जिल्ह्यातील दुष्काळसदृश्य परिस्थितीच्या पार्श्वभूमीवर पिकांची सद्यस्थिती व उत्पादनक्षमतेचा प्रत्यक्ष आढावा घेण्यासाठी जिल्हाधिकारी यांनी विविध गावांमध्ये पीक पाहणी केली.
कुऱ्हापानाचे येथे कापूस, सोयाबीन व मका पिकांच्या प्रक्षेत्रांची पाहणी करून पिकांची सद्यस्थिती, वाढ व उत्पादनाबाबत माहिती घेण्यात आली. त्यानंतर चोरवड येथे सोयाबीन व मका पिकांची पाहणी करण्यात आली. तसेच जामनेर तालुक्यातील महुखेडा येथे मका, सोयाबीन व तूर पिकांच्या प्रक्षेत्रांची पाहणी करून शेतकऱ्यांकडून पिकांच्या स्थितीबाबत माहिती जाणून घेण्यात आली.
दुष्काळसदृश्य परिस्थितीमुळे पिकांवर झालेला परिणाम, उपलब्ध ओलावा, पिकांची वाढ व संभाव्य उत्पादनस्थिती याबाबत प्रत्यक्ष क्षेत्रीय पाहणीद्वारे वस्तुनिष्ठ माहिती संकलित करण्यात येत आहे. या पाहणीच्या माध्यमातून शेतपिकांची प्रत्यक्ष स्थिती समजून घेऊन आवश्यक त्या प्रशासकीय कार्यवाहीसाठी वस्तुनिष्ठ माहिती उपलब्ध करून घेण्यावर भर देण्यात येत आहे.
