जळगाव (प्रतिनिधी) शहरातील प्रसिद्ध सराफ व्यावसायिक राजमल लखीचंद ज्वेलर्समध्ये अर्थात आरएल शो रूममध्ये आज सक्त वसुली संचालनालय (इडी) आणि आयकर विभागाकडून चौकशी केली जात असल्याचे वृत्त समोर आल्यानंतर प्रचंड खळबळ उडाली आहे.
जळगावातील राजमल लखीचंद ज्वेलर्समध्ये गुरुवारी पहाटे गाड्यांचा ताफा पोहचला. फर्ममध्ये सक्तवसुली संचालनालय आणि आयकर विभागाची धाड पडल्याची चर्चा सुरुवातीला समोर आली. मात्र, फर्मशी संबंधित एका व्यक्तीने सक्तवसुली संचालनालय आणि आयकर विभागाकडून चौकशी सुरु असून माजी आ.मनीष जैन हे मध्ये अधिकाऱ्यांशी बोलत असल्याचे सांगितले.
सध्या फर्ममध्ये सक्तवसुली संचालनालय आणि आयकर विभागाचे अधिकारी चौकशी करीत आहे. फर्ममध्ये ग्राहकांना जाऊ दिले जात नव्हते. त्यामुळे कर्मचारी देखील बाहेर उभे होते. दोन्ही पथक कोणत्या मुद्द्यावर चौकशी करीत आहेत हे अद्याप समोर आलेले नसून काही वेळाने माहिती देण्यात येणार असल्याचे सांगण्यात आले आहे. दरम्यान, मनी लॉंड्रींगच्या प्रकारची चौकशी सुरु असल्याची देखील चर्चा आहे.
