नवी दिल्ली (वृत्तसंस्था) एकनाथराव खडसे यांनी दिल्लीमध्ये केंद्रीय गृहमंत्री अमित शाह यांची भेट घेतली आहे. त्यामुळे पुन्हा एकदा खडसेंच्या भाजप प्रवेशाच्या चर्चांना उधाण आलं आहे. विशेष म्हणजे यावेळी केंद्रीय राज्यमंत्री रक्षाताई खडसे ह्या देखील उपस्थित होत्या.
काल रात्री केंद्रीय राज्यमंत्री रक्षा खडसे आणि ज्येष्ठ नेते एकनाथ खडसे यांनी केंद्रीय गृहमंत्री अमित शाह यांची भेट घेतली. ही सदिच्छा भेट असल्याचे सांगण्यात येत आहे. एकनाथ खडसे लवकरच भाजप मधे प्रवेश करणार असल्याच्या चर्चा सुरू आहेत त्या पार्श्वभूमीवर भेटीला महत्व आले आहे. यापूर्वी सुद्धा लोकसभा निवडणुकीच्या धबाडग्यात दोन्ही नेत्यांची भेट झाली होती. गुरुवारी रात्री अमित शहा आणि एकनाथ खडसे यांच्यात या भेटीत नेमकी काय चर्चा झाली? हे अद्याप स्पष्ट झाले नाही. मात्र, लोकसभेतील धक्कादायक निकालानंतर उपमुख्यमंत्री देवेंद्र फडणवीस यांचे पंख छाटण्याची तयारी सुरु असून त्यातच खडसे यांनी अमित शहांची भेट घेतल्यामुळे त्यांच्या खांद्यावर भाजप संघटनेची एखादी मोठी जबाबदारी देण्यात येईल, असे सांगितले जात आहे. भाजपमध्ये घरवापसी होताच एकनाथराव खडसेंच्या हाती मोठी जबाबदारी दिली जाणार असल्याचे बोलले जात आहे.
